Саха тыйаатыра бэтэрээннэри премьераҕа ыҥырар

07.05.2017
Бөлөххө киир:

Ыам ыйын 7 күнүгэр күнүс 14 чаастан уонна ыам ыйын 8 күнүгэр күнүс 16:00 чаастан Былатыан Ойуунускай аатынан Саха академическай тыйаатыра режиссер Марина Варбут “Сэрии суруктара” испэктээкилин премьератыгар ыҥырар. edersaas.ru

Саллааттар, төрөөбүт дойдубут туһугар олохторун толук уурбут дьон суруктарын ааҕыы  көннөрү сюжеттааҕар ол кэмнэри ордук толору көрдөрүө диэн быһаарбыппыт, диир режиссер.

Айымньыга  Дмитрий Петров “Саллаат суруктара” кинигэтиттэн, чопчу дьон, дьиэ-кэргэн архыыбыттан матырыйааллар туһаныллыбыттар. Саха сирин хорсун уолаттара – Сэбиэскэй Сойуус Дьоруойдара Федор Попов, Клавдий Краснояров суруктара көстөн ааһаллар…

Сүрүн оруолларга артыыстар Роман Дорофеев – почтальон, Елена Румянцева – Лена, Айаал Аммосов, Дмитрий Михайлов, Надежда Ушницкая, Софья Баранова, Зоя Багынанова, Лена Маркова, Ильяна Павлова, Валентин Макаров, о.д.а. оонньууллар. Режиссер Марина Варбут этэринэн, испэктээккэ “массовка” диэн суох – артыыстар бука бары бэйэлэрэ чопчу оруоллаахтар.

Худуоһунньук – Михаил Егоров, Сардаана Федотова көстүүмнэрэ.

Айымньы элбэх ырыалаах, муусукалаах. Баянист оруолугар СӨ үтүөлээх артыыһа Сергей Попов ыҥырыллан, сэрии сылларынааҕы, дьон-норуот сөбүлээн ыллыыр – “Синий платочек”, “Хайыһар”, “Сурук тоҕо кэлбэт?”, “В землянке”, “Катюша”, “Ночь коротка”, “Темная ночь” , “Я сегодня до зари встану…”, о.д.а. ырыалара истиҥник толоруллуохтара.

Испэктээкили туруорааччылар идиэйэлэрэ оннук – ытыктабыллаах сэрии, тыыл бэтэрээннэрэ оҕолорунаан, сиэннэринээн, чугас дьоннорунаан кэлэннэр, таптыыр ырыаларын артыыстары кытта бары бииргэ ыллаһыахтара.

Киириитэ босхо.

Татьяна Маркова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0