Саха тыйаатыра 100 сыллаах үбүлүөйү көрсө саҥа айымньылары сүрэхтиир
Бүгүн, кулун тутар 9 күнүгэр, Саха тыйаатырыгар кулун тутар ыйга тахсар премьералары билиһиннэрэр пресс-кэмпириэнсийэ ыытылынна. Кэлбит суруналыыстарга Саха тыйаатырын дириэктэрэ Петр Макаров Саха Өрөспүүбүлүкэтин 100 сыллаах үбүлүөйүн көрсө былааннаммыт үлэни-хамнаһы билиһиннэрдэ.
Итиэннэ мантан саас тыйаатыр уус-уран салайааччыта Андрей Борисов, сүрүн режиссера Руслан Тараховскай саҥа испэктээкиллэри таһаарар соруктаахтарын туһунан иһитиннэрдилэр. Салгыы режиссердар Сергей Потапов, Карл Сергучев уонна талааннаах артыыс, саҕалаан эрэр туруорааччы-режиссер Василий Борисов кулун тутар ыйга тахсаары турар айымньыларын туһунан сэһэргээтилэр. Ол курдук, кулун тутар 11-13 күннэригэр Эрилик Эристиин «Маарыкчаан ыччаттара», 18-20 күннэригэр Г.Дьячков «Саһарҕа хоптото», онтон 25-27 күннэригэр И.Вилквист «Бүтэһик малыыппа» испэктээкиллэр көрөөччү дьүүлүгэр тахсыахтара.
Көрсүһүүгэ иһитиннэрэр-көрдөрөр ситимнэр дьону тыйаатыр эйгэтигэр угуйар, ыҥырар ньыма эрэ быһыытынан буолбакка, көрөөччүнү иитэр, ыччаты искусство ис хоһоонугар быһаччы сирдиир далаһа быһыытынан сыаналаныахтаахтара ахтылынна. Онуоха сонуну кэпсиир, сэһэргиир таһымтан тэйэн, айымньыны ырытар, сонун санаалары тиэрдэр, кыһалҕалары көтөҕөр кыахха киирии сүрүн тосхол быһыытынан этилиннэ.
П.А.Ойуунускай аатынан
Саха академическай тыйаатырын
пресс-сулууспата.