Бэҕэһээ Саха Өрөспүүбүлүкэтин Марфа уонна Сергей Расторгуевтар ааттарынан судаарыстыбаннай циркэтэ төрүттэммитэ 25 сылын бэлиэтээтибит.
Үйэ чиэппэрэ үбүлүөйдээх циркэҕэ бу, 2019 сыл алтынньы 4-13 күннэригэр ыытылла турар VI норуоттар икки ардыларынааҕы “Мамонтенок” циркэ бэстибээлигэр ыраахтан-чугастан кыттааччылар кэлэннэр, планета саамай хотугу, ирбэт тоҥноох сиригэр Саха циркэтин дьиҥнээх өрөгөйө — норуот бырааһынньыга буола турар.
Үбүлүөй үөрүүлээх чааһа – эҕэрдэлэр, наҕараадалар. Махтал Суруктары, өйдөбүнньүк бэлэхтэри өрөспүүбүлүкэ салалтатын аатыттан СӨ Бырабыыталыстыбатын Бэрэссэдээтэлин солбуйааччы Ольга Балабкина, Ил Түмэн аатыттан Судаарыстыбаннай Мунньах Бэрэссэдээтэлин солбуйааччы Антонина Григорьева, СӨ култууратын, духуобунай сайдыытын миниистирэ Юрий Куприянов туттардылар. Өр сыллаах, айымньылаах үлэлэрин иһин циркэ артыыһыгар Альберт Ноговицыҥҥа уонна циркэ кылаабынай худуоһунньугар Петр Винокуровка “СӨ култууратын туйгуна”, циркэ суоппара Владимир Стручковка “СӨ Автомобильнай тырааныспарын Бочуоттаах үлэһитэ”, үгүс сыллар устата үтүө суобастаах үлэтин иһин Савва Яковлевка, бочуоттаах ааттар иҥэрилиннилэр.
Арассыыйа Цирковой диэйэтэллэрин сойуустарын бэрэссэдээтэлэ Евгений Биляуэр үбүлүөйдээх Сахациркэ дириэктэригэр Сергей Расторгуевка, о.д.а. “Арассыыйа циркэтин 100 сыла” бэлиэлэри туттарда. Бу киэһээ үгүс үтүө, махтал тыллара Пекиннээҕи циркэ оскуолатыгар саха талааннаах ыччатын үөрэххэ ыытыыны көҕүлээбит, тэрийбит Матвей Мучиҥҥа, Артем Слепцовка, уонна, биллэн турар, СӨ Бастакы бэрэсидьиэнэ Михаил Николаевка ананнылар.
Үбүлүөйдээх тэрээһин иккис түһүмэҕэр “Мамонтенок” бэстибээл кыайыылаахтара көрөөччүлэргэ чаҕылхай нүөмэрдэрин бэлэхтээтилэр. Манна саамай үөрүүлээҕэ – 96 кыттааччыттан 46-та — инники сыллардааҕы уонна былырыыҥҥы “Мамонтенок-2018” циркэ бэстибээлин лауреаттара буолаллар.
Оттон олус долгутуулаах түгэнинэн, “Хайдах саҕаламмытай?”, диэн түһүмэх буолла. Бу билигин аан дойдуга биллэ үүммүт, сайдыбыт Саха бриллиантовай циркэтэ, оттон оччолорго Синтез-тыйаатыр бастакы хардыыларын оҥорон эрдэҕинэ эдэркээн жонглер сүүһүгэр уура сылдьар уһун маһын төбөтүгэр турар таас чорооҥҥо көмүс саарыгы таба түһэриититтэн саҕаламмыта эбээт… Сергей Васильевич, үүт-үкчү эмиэ оччолорго курдук, көрөөччүлэрин балачча долгута түһэн баран, дьэ, тапта!
Ыалдьыт санаата
Эрендорж Жорж, Монголия култууратын үтүөлээх диэйэтэлэ:
—Мин Саха сиригэр бу иккис кэлиим. “Мамонтенок” норуоттар икки ардыларынааҕы циркэ бэстибээлигэр 5 сыллааҕыта эмиэ кыттыбыппыт. Ол кэм кэнниттэн Дьокуускай куорат олус тупсубутун, сайдыбытын үөрэ көрөбүн. Ол эрээри, мин санаабар манна саамай сыаналааҕа, суолталааҕа – ыраас, чэбдик салгыҥҥыт! Ону харыстааҥ… Циркэ туһунан эттэххэ – биһиэхэ Монголияҕа судаарыстыбаннай циркэ суох – бары чааһынайдар. Уонна, холобур, 70-ча артыыстаах Улан-Батор циркэтэ баһыйар үксүн атын судаарыстыбаларга – Турциянан, Кэриэйэнэн, Япониянан, онтон да атын дойдуларынан уһун кэмнэрдээх гастролга сылдьар. Саха циркэтин судаарыстыба өйүүрэ олус үчүгэй, махталлаах дьыала. Мин, талааннаах салайааччы ытыктабыллаах Сергей Васильевич Расторгуевка уонна бары биир идэлээхтэрбэр өссө үрдүк ситиһиилэри баҕарабын!
Татьяна МАРКОВА.
Ааптар хаартыскаҕа түһэриитэ.