Дьокуускай куорат дьаһалтатын баһылыга Айсен Николаев «Вкус Якутии» бэстибээл саха норуотун аһын-үөлүн саҥаттан-саҥа таһымҥа таһаарарын туһунан «Вкус Якутии» IV-с гастрономическай бэстибээлгэ бэлиэтээтэ. Бу туһунан Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытта үлэҕэ Департамена иһитиннэрэр.
—Далааһыннаах тэрээһин үөрүүлээх аһыллыыта бэҕэһээ «Каре» эрэстэрээҥҥэ буолла. Санатан эттэххэ, бэстибээл «Кыһын Саха сириттэн саҕаланар» Бүтүн Арассыыйатааҕы тэрээһин чэрчитинэн төрдүс төгүлүн ыытыллар. Түһүлгэҕэ мустубут дьону куорат баһылыга А.С.Николаев истиҥник эҕэрдэлээн туран, хотугу норуоттар астарын-үөллэрин арааһа олус элбэҕин, сибиэһэйин, иҥэмтиэлээҕин, доруобуйаҕа туһалааҕын ыйда. Ону сыаналаан туран Бүтүн Арассыыйаҕа, аан дойдуга тиийэ биллэрэргэ-көрдөрөргө кыһаллыахтаахпытын эттэ. Аан дойдуттан биһиги Сахабыт сиригэр баай Ийэ айылҕабытын, иҥэмтиэлээх, туһалаах аспытын-үөлбүтүн сэҥээрэн, сэргээн, үрдүктүк сыаналаан туран кэлэллэрин курдук үлэни ыытыахтаахпытын, тарҕатыахтаахпытын ыйда, — диэн бэлиэтииллэр.
А.С.Николаев биһиги киин куораппыт эрэстэрээннэрэ бу тэрээһинтэн үтүө холобуру ылан, элбэххэ үөрэнэн үлэлэрэ тупсан, сайдан иһэрин эппит. Куонкуруһу тэрийсэр, үлэлэһэр дьонугар-сэргэтигэр, өйүүр көмөлөһөөччүлэригэр махтаммыт. Арассыыйа шеф-повардарын Национальнай Гильдияларын чилиэнэ Николай Сарычев ураты сэргэх, интэриэһинэй тэрээһин буоларыгар эрэнэрин биллэрбит. Салгыы «Каре» эрэстэрээн бэлэмнээбит тоҕус араас бүлүүдэтин тэрилтэ управляющайа Глеб Азарченко билиһиннэрбит.
Манна даҕатан эттэххэ, инники суруллубутун курдук, «Вкус Якутии» бэстибээлгэ бүлүүдэлэр этническэй уонна классическай эрэстэрээннэр диэн категорияларынан сыаналаналлар. Түмүккэ, хас биирдии категорияҕа үстүү номинация олохтонон, дипломнар уонна сыаналаах бириистэр туттарыллаллар. Ону сэргэ, Дьокуускай куорат баһылыгын Кубога анал бириис быһыытынан бэлэхтэнэр. О.д.а. бириистэр үөрүүнү үксэтиэхтэрэ диэн тэрийээччилэр этэллэр.
Кыайыылаахтары эҕэрдэлээһин ахсынньы 3 күнүгэр «Триумф» спортивнай кииҥҥэ буолар.
Хаартыскалар: Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытта үлэҕэ Департамена