Маны аах Уопсастыба

Саха суруналыыстара пуорумҥа кытыннылар

Сочи куоракка «Вся Россия» диэн аныгы суруналыыстыка пуорума буола турар.

Саха сириттэн 18 киһилээх улахан дэлэгээссийэ тиийэн, кытта сылдьар. Дэлэгээссийэни Саха сирин Суруналыыстарын сойууһа (бэрэссэдээтэл Г.А. Бочкарева) салайан илтэ. Манна »Сахамедиа», СИА, ону тэҥэ, »Саха сирэ», »Ил Түмэн», »Якутск вечерний», »Кыым» хаһыаттар уонна улуус хаһыаттарын эрэдээктэрдэрэ, кэрэспэдьиэннэрэ бааллар.
Быыстапкалыыр саала киэҥ уораҕайыгар эрэгийиэннэр павильоннарын киэргэппиттэр, баннердары, хаартыскалары ыйаабыттар, хаһыаттарын, сурунаалларын, кинигэлэрин тэлгэппиттэр. Ставрополье суруналыыстара дьаабылыканан слон оҥорбуттар, дьоҥҥо дьаабылыка түҥэтэллэр, олохтоох сыырынан, халбаһынан күндүлүүллэр. Байыаннай фотокэрэспэдьиэннэр быыстапкалара турар.
Саха сирин дэлэгээссийэтэ пуорум аһыллар күнүгэр атын сойуустартан аан бастакынан үлэтин-хамнаһын билиһиннэрдэ. Галина Бочкарева саҥа тахсыбыт »Саха сирин суруналыыстара» энциклопедияны сүрэхтээтэ, сойуус ыытар үлэтин билиһиннэрдэ.
»Сахамедиа» генеральнай дириэктэрэ Виктор Колесов холдинг бырайыактарын туһунан кэпсээтэ.
»Ил Түмэн» кыһа салайааччыта, Ил Түмэн дьокутаата Мария Христофорова национальнай суруналыыстыка туһунан санаатын эттэ.
»Саха сирэ» хаһыат эрэдээктэрин солбуйааччы Анивера Акимова хаһыат бырайыактарын, саайтарын билиһиннэрдэ.
Ону тэҥэ, суруналыыстар сахалыы сайбаччы таҥнан кэлэн, саха култууратын үгүс жанрдарын: тойугу, оһуохайы, хомуһу, ырыаны, үҥкүүнү барытын көрдөрөн, дьон сэҥээриитин ыллылар. Саха сирин дэлэгээссийэтэ куруук уратытык, сэргэхтик билиһиннэрэр диэн биһирииллэр, кэлэн хаартыскаҕа түһэллэр.
Арассыыйа Суруналыыстарын сойууһун бэрэссэдээтэлэ Владимир Соловьев Саха сирин Суруналыыстарын сойууһа тыһыынчаттан тахса чилиэннээҕин, дойдуга биир улахан идэтийбит түмсүү буоларын, өрүү көхтөөх үлэлээҕин бэлиэтээтэ.
Пуорум үлэтэ олус киэҥ, интэриэһинэй. Манна аныгы суруналыыстыка туһунан »төгүрүк остуоллар, үөрэтэр маастар-кылаастар, бырайыактары сүрэхтээһиннэр, уо.д.а. буолаллар.

Ангелина Васильева, »Саха сирэ» хаһыат, edersaas.ru
Хаартыска: ааптар түһэриитэ.

1
0
Telegram Whatsapp