Бэс ыйын күнүгэр Дьокуускайга саха снайперыгар анаммыт пааматынньыгы арыйдылар. Пааматынньык “Туймаада саллаата” мемориалга турар. Үөрүүлээх арыйыыга Ил Дархан Айсен Николаев, мэр Сардаана авксентьева, бэтэрээннэр сэбиэттэрин бэрэссэдээтэлэ Иванов, бырабыыталыстыба чилиэннэрэ кытыннылар.
edersaas.ru
Биир мүнүүтэ чуумпуран, Аҕа дойду сэриитигэр өлбүт буойуттары кэриэстээтилэр, сибэкки дьөрбөтүн ууран, сүгүрүйэллэрин биллэрдилэр.
“Бу күн 75 сыллааҕыта Москваҕа Кыһыл Аармыйа параада буолбута. Аҕыйах чааһынан Москваҕа Кыһыл болуоссакка Кыайыы 75 сылыгар анаммыт параад саҕаланыаҕа. Онон бу ытык күн биһиги хорсун снайпердарбытын чиэстиирбит оруннаах.
Сэрии саҕаланыаҕыттан саха ытааччылара бэйэлэрин хорсун, тулуурдаах, олус кыраҕы буойун быһыытынан көрдөрбүттэрэ, ол иһин элбэх киһи сэбиэскэй снайпердар кэккэлэригэр киирбиттэрэ. Аатырбыт снайпердары – Сэбиэскэй Сойуус Дьоруойдарын Федор Охлопковы, Алексей Мироновы уонна хорсун-хоодуот Иван Кульбертиновы, Егор Петровы, Дмитрий Гуляевы, уо.д.а. өйдүүбүт, сүгүрүйэбит, киэн туттабыт. 1942 сыллаахха “Снайпер” диэн түөскэ кэтиллэр бэлиэ оҥоһуллубута. Сүүстэн тахса саха снайпера ити бэлиэни киэн тутта түөстэригэр кэппиттэрэ, — диэн Айсен Николаев бэлиэтээтэ.
Пааматынньыгы “Мечел” хампаанньа Каслинскай собуокка оҥорторбут, тутар этэрээттэр туруорарга үлэлэспиттэр. “Туймаада саллаата” комплекс биэс сыллааҕыта тутуллубута, 20 тыһыынча буойун аата суруллубута. Саха снайперын хомуур уобараһын бэлиэтиир пааматынньык бу комплекска чуо-бааччы миэстэтин булан, ситэрэн-хоторон биэрдэ.
Ангелина Васильева, “Саха сирэ” хаһыат, edersaas.ru
Хаартыска: Мария Васильева.