Уһук Илин экэнэмиичэскэй сайдыытын судаарыстыбаннай бырагырааматыгар Саха сириттэн түөрт бырайыак бигэргэннэ.
«Уһук Илин уонна Байкал регионун социальнай-экэнэмиичэскэй» судаарыстыбаннай бырагырааматыгар 147 млрд. солк. кээмэйдээх 24 инвестиционнай бырайыак бигэргэннэ. Манна Саха сириттэн түөрт производственнай бырайыак киирдэ: маһы таҥастыыр комплексы тэрийии (инвестор — «Якутлесресурс» ГАУ), керамическай кирпииччэ собуотун тутуу (инвестор — «Возрождение» ХЭТ), таба тириититтэн замшаны оҥорон таһаарыы (инвестор — «Сахабулт» ФАПК АУо), «Кангалассы» ТОРга ювелирнай-гранильнай кластеры тэрийии (инвестор — «СЭЙБИЭМ» ХЭТ).
— Бу инвестиционнай бырайыактар чааһынай инвестиция суотугар олоххо киириэхтэрэ. Федеральнай үбүлээһин манна көрүллүбэт. Ол эрээри бу бырайыактары судаарыстыбаннай бырагыраамаҕа киллэрэн, бизнес сайдыытыгар хаачыстыбалаах административнай өйөбүл оҥоһуллуоҕа. Ону таһынан атын бырайыактарга эбии инвестицияны тардыыга статуһу үрдэтиэҕэ. Бу хайысхаҕа тустаах үлэ бара турар, — диэн бэлиэтээтэ РФ Бэрисидьиэнин Уһук Илиннээҕи федеральнай уокурукка боломуочунайа Юрий Трутнев.
«Якутлесресурс» ГАУ генеральнай дириэктэрэ Вадим Новиков быһаарыытынан, маһы таҥастыыр комплекс Алдан оройуонугар тэриллиэҕэ.
Бырайыак бизнес-былаана оҥоһуллубут. Комплекс үлэтин үөһээ Амма сиригэр-уотугар ыытыаҕа. Бу туһунан тэрилтэ пресс-сулуспата иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.