Бу күннэргэ дойду эрэгийиэннэриттэн Москва куоракка Улуу Кыайыы параадын тэрийээччилэргэ көмөлөһө «Кыайыы посола» куонкурус кыайыылаахтара тиийдилэр.
Былырыыҥҥы чахчынан дойду эрэгийиэннэригэр 85 волонтердар салаалара, 838 бу муниципальнай ыстааптара бааллар. Уопсастыбаннай хамсааһын тустаах официальнай саайтыгар 200-тэн тахса тыһыынча волонтер бэлиэтэммит.
«Кыайыы волонтёра» хамсааһын Москваҕа “Өлбөт үйэлээх полк” хаамыы кыттыылаахтарын арыаллыыр, көмөлөһөр, өйөбүл буолар уопсастыбаннай тэрилтэ. Ыам ыйын 6 күнүгэр “Кыайыы посола — 2022” куонкурус кыайыылаахтарын сүлүөтэ ыытыллыбыта. Манна 80 эрэгийиэнтэн Арасыыйаҕа ыытыллыбыт куонкурус 100 бастыҥ кыайыылааҕа кыттыыны ылбыта. Кинилэр ортолоругар Саха сириттэн 33 №-дээх орто оскуола историяҕа учуутала Анисья Винокурова баар.
Волонтердар Москваҕа Кыһыл болуосакка Улуу Кыайыы параадыгар кыттар ытык бэтэрээннэри арыаллыахтара.
«Бу куонкуруска бастыҥтан бастыҥнар кыайаллар. Кинилэр үлэлэрэ Аҕа дойду Улуу сэриитин кыттыылаахтарын кытта ыкса сибээстээх”, — диэн сүлүөт кэмигэр бэлиэтээбитэ “Кыайыы волонтера” хамсааһын салайааччыта Ольга Занко.
Анисья Винокурова Москва куоракка үлэлиэхтээх волонтердар куонкурустарыгар хайдах кыттыбытын туһунан кини үөрэппит учуутала, педагогическай үлэ бэтэрээнэ Тамара Винокурова кэпсиир:
— Анисья Винокурова — Тымныы полюһунан аатырар Өймөкөөн улууһун 1-кы гильдиялаах меценат- атыыһыта Н.О. Кривошапкин аатын сүгэр Өймөкөөн орто оскуолатын выпускнига. Кини оскуолаҕа үөрэнэр сылларыгар өрүү бастыҥнар кэккэлэригэр сылдьара. Кыра эрдэҕиттэн барытыгар көхтөөх этэ. Анисья ийэтин, СӨ үтүөлээх учуутала, үөрэҕирии туйгуна Альбина Алексеева туйаҕын хатаран, кинини утумнаан история учуутала буолбута. Аҕата Валерий Винокуров аан дойдуга Тымныы полюһунан биллэр Өймөкөөн нэһилиэгин метеоыстаансыйатыгар үлэлээбитэ, үлэ бэтэрээнэ.
Анисья Винокурова аҕатынан эһээтэ Лазарь Винокуров нэһилиэк бастакы хомсомуола, улуус Бочуоттаах олохтооҕо, Саха АССР норуотун хаһаайыстыбатын бочуоттаах үлэһитэ. Оттон “Кыайыы волонтера” куонкуруска ийэтинэн хос эһэтин Михаил Павлов туһунан ”Мин дьиэ кэргэним Аҕа дойду Улуу сэриитин кэмигэр” диэн видеоролигы оҥорон кыттыыны ылбыта. Анисья куонкурус кыайыылаахтара ыам ыйын 9 күнүгэр параакка кыттар бэтэрээннэри арыаллыылларын туһунан саайтка аахпыт. Кини бэйэтин Сахатын сирин былааҕын тутан тахсыаҕын олус баҕарбыт. Сотору кэминэн Анисья Винокурова “Кыайыы посола” диэн куонкурус кыайыылааҕын быһыытынан параакка ыҥырыы суругу туппут. Волонтердар Москва куорат мээрэ Сергей Собянин дьаһалынан түһэр сирдэрэ, аһылыктара, куорат устун айанныыллара – босхо.
Анисья Винокурова саамай үөрэрэ – “Өлбөт полкаҕа” хос эһэтин Михаил Павлов хаартыскатын туппутунан Москва устун хаамарыттан.
… Бу курдук, Тымныы полюһуттан Өймөкөөнтөн төрүттээх эдэр учуутал-волонтер Анисья Винокурова бары суолталаах тэрээһиннэргэ Сахатын сирин былааҕынан туппутунан сылдьар.
Елена ПОТОЦКАЯ, “Саха сирэ” хаһыат, edersaas.ru
Хаартыска Тамара Винокурова тиксэриитэ.