Саха сирин олохтоохторо Сэбиэскэй Сойуус Дьоруойун, бастакы космонавт-дьахтары, Судаарыстыбаннай Дуума дьокутаатын Валентина Терешкованы үбүлүөйүнэн эҕэрдэлээтилэр.
Роман Попов, “Саха сирэ” хаһыат, https://edersaas.ru
Валентина Терешковаҕа «Биир ньыгыл Арассыыйа» баартыйа тэрийэн ыыппыт тэрээһинигэр эдэр-эмэн дьон, оҕолор, уопсастыбаннай тэриллиилэр бэрэстэбиитэллэрэ, салайааччылар кытыннылар. Кинилэр Валентина Владимировнаҕа истиҥ илдьиттэригэр аан дойдуга космонавтика сайдыытыгар дьоһун кылаатын, үүнэр көлүөнэҕэ үтүө холобур буоларын ыйдылар, кытаанах доруобуйаны, уһун олоҕу баҕардылар.
Санатар буоллахха, кулун тутар 2 күнүгэр Арассыыйа бэрэсидьиэнэ Владимир Путин Арассыыйаҕа судаарыстыбаннаһы, парламентаризмы бөҕөргөтүүгэ, сокуону оҥорууга актыыбынай үлэтин иһин авиация оставкаҕа генерал-майора Валентина Терешкованы “Аҕа дойдуга үтүөлэрин иһин” I степеннээх уордьанынан наҕараадалаата.
Валентина Терешкова үбүлүөйүн омук дойдуларыгар эмиэ киэҥник бэлиэтээтилэр. Ол курдук, Римҥэ, Прагаҕа үөрүүлээх мунньахтар, быыстапкалар буоллулар.
Ыспыраапка
Валентина Терешкова 1963 сыл бэс ыйын 16 – 19 күннэригэр “Восток-6” хараабыл хамандыырынан космоска бастакы көтүүтүн оҥорбута. Онно кини ыҥырар сигнала “Чайка” диэн этэ. Анал бырагырааманан орбитаҕа Валерий Быковскай хамандыырдаах “Восток-5” хараабылы кытта сэргэстэһэ көппүтэ. Барыта космоска икки суукка 22 чаас 50 мүнүүтэ устата сылдьыбыта. Ити кэм устата хараабыл Сири 48-та эргийбитэ.
Роман Попов, “Саха сирэ” хаһыат, https://edersaas.ru