Култуура

Саха сириттэн Арассыыйаҕа киинэ көрдөрөргө

Киинэ оҥоруутун биир сүрүн кыһалҕатынан Арассыыйаҕа көрдөрөр сир аҕыйаҕа буолар. Бу куруутун нэһилиэнньэ аҕыйаҕар эрэ олоҕурбат – киинэни көрдөрөр тэрил сыаната ыараханыттан эмиэ улахан тутулуктаах.

Саха сирин киинэ ситимин салайааччыта Петр Чиряев этэринэн, киинэ көрдөрөр тэрил сыанатыгар улахан форматы туһаныы иһин лицензионнай төлөбүр ылар:

— Аныгы киинэ тыйаатырдара бары Голливудка ылыныллыбыт DCI стандартынан үлэлииллэр. Ити киинэни көрдөрөр тэрили “пираттааһынтан” харыстыыр, лицензията суох киинэни көрдөрөрү, куоппуйалыыры хааччахтыыр. Ол эрээри, DCI туруоруута ыарахан, онон кыра нэһилиэктэр, тэрилтэлэр итинник тэрили атыылаһарга үптэрэ тиийбэт. Онон биһиги “пираттааһынтан” харыстыыр саҥа систиэмэни оҥорорго санаммыппыт, проекторга көмүскэл баар буолан баран сыаната удамыр буоларын туһугар.

Арассыыйатааҕы креативнай нэдиэлэ чэрчитинэн Петр Чиряев «Extra Cinema» диэн ааттаах Арассыыйа киинэ көрдөрөр саҥа ситимин бырайыагын көрдөрдө. Саҥа технологическай быһаарыы уонна дойду иһигэр оҥоһуллубут киинэ проектора “Якутия” технопаарка күүһүнэн оҥоһуллубут.

Креативнай нэдиэлэ пленарнай мунньаҕар Саха сирин Аҕа баһылыга Айсен Сергеев “Саха сиригэр киинэни оҥорууну өйөөһүн биир сүрүн сорукпут буолар” диэн эппитэ. Билигин биһиги өрөспүүбүлүкэбит атын эрэгийиэннэр ортолоругар киинэ сайдыытыгар бастыҥнарынан буолар. Сыл аайы 10-15 уларсыкка (быракаакка) тахсар уус-уран киинэлэр оҥоһуллан сүрэхтэнэллэр.

Петр Чиряев этэринэн, DCI лицензиятын буолбакка, бэйэ оҥорбут систиэмэтин туһанар буоллахха, киинэ көрдөрөр тэрил сыаната хас да төгүл чэпчиир. Быһа холоон «Extra Cinema» таһаарар проектордара 4-5 мөл. солк. сыаналаах буолуохтаахтар.

— Арассыыйаҕа 150 тыһ. нэһилиэнньэлээх пуун баар. 2019 сыл көрдөрүүлэринэн, дойду үрдүнэн  2150 киинэ тыйаатыра үлэлиир, олортон Москваҕа — 100, Санкт Петербурга 50, атыттара улахан куораттарга бааллар. Дьоҕус нэһилиэнньэлээх пууннар олохтоохторо киинэни көрөр кыахтара суох. Биһиги проектордарбытын 5 тыһ. саалаҕа тарҕатан 20 мөл. нэһилиэнньэни хабар былааннаахпыт. Бырайыакпыт Арассыыйаҕа оҥоһуллубут киинэлэри көрдөрөр буолуоҕа, — диэн эттэ Петр Чиряев.

СӨ Инновация уонна цифровой сайдыы миниистирэ Анатолий Семенов этэринэн маннык бырайыак үлэҕэ киириитэ бүгүҥҥү олох ирдэбилигэр эппиэттир:

— Билигин Саха киинэтэ айар суолу, ньыманы көрдөөһүнү таһынан эрэллээх биисинэс бырайыактары оҥорууга толкуйун уурар кэмэ. Онно анаан өрөспүүбүлүкэбитигэр сөптөөх усулуобуйалар олохтоно тураллар.  “Якутия” технопаарка иһинэн араас сайдыы суоллара айыллаллар, ыраах сытар нэһилиэктэргэ түргэн сибээс ситимнэрэ тиийэллэр. Сайдыыга сыһыаннаах, элбэҕи өрө тардыан сөптөөх бырайыактары өйүүбүт.

Бу бырайыак бастаан Саха сиригэр тургутууну ааһыаҕа онтон Арассыыйа үрдүнэн тарҕаныаҕа. Билигин пилотнай бырайыак быһыытынан 10 нэһилиэнньэлээх пууҥҥа «Extra Cinema» киинэ көрдөрөр тэриллэрэ үлэҕэ киирбиттэрэ. Проектардары атыылаһарга муниципальнай тэрилтэлэргэ өрөспүүбүлүкэ бүддьүөтүттэн үп көрүллүбүтэ. Киинэ саалалара балаҕаны ыйын бүтүүтэ үлэҕэ киириэхтээхтэр.

0
0
Telegram Whatsapp