Бары билэрбит курдук, Арассыыйаҕа футболга аан дойду чөмпүйэнээтин оонньуулара ыытылыннылар. Онно барыта 200-тэн тахса араас дойдуттан күрэхтэһээччилэр, ыалдьааччылар, волонтердар кэлэн ый устата футбол тула муһуннулар.
Улахан тэрээһиҥҥэ 2000 волонтер, ол иһигэр Саха сириттэн 40 киһи чөмпүйэнээт ыалдьыттарын көрсүүгэ-атаарыыга, суһал көмөнү оҥорууга уонна да атын көдьүүстээх үлэлэргэ көмөлөһөн, тэрээһин үрдүк таһымнаахтык ааһарыгар бэйэлэрин кылааттарын киллэрдилэр.
Бу улахан тэрээһиҥҥэ Саха сириттэн волонтердар кыттыыны ылаллара өссө 2017 сыл ахсынньытыгар Санкт-Петербурга Саха сирэ күннэрэ ыытылла турдаҕына эрэгийиэннэр баһылыктарын мунньаҕар быһаарыллыбыта. Ол кэнниттэн сыл аҥаарын устата волонтерга хандьыдааттары сүүмэрдээһин ыытыллыбыта. Сүүмэрдээһини ааспыт дьон аан дойду чөмпүйэнээтигэр барар үөрүүлээх сонуну туппуттара.
Волонтердар от ыйын 20 күнүгэр пресс-конференцияҕа суруналыыстарга тэрээһин хайдах ааспытын туһунан сиһилии кэпсээтилэр.
Ализана СЛЕПЦОВА: «Санкт-Петербурга биир ый футбол чөмпүйэнээтигэр сылдьыбыппын хаһан да умнуом суоҕа. Маннык улахан тэрээһиҥҥэ кыттыыны ылбыппынан киэн туттабын. Улахан махталбын СӨ ыччат дьыалатын уонна дьиэ кэргэн бэлиитикэтин министиэристибэтигэр уонна Санкт-Петербурга тиэрдэбин».
Оҕолор кэпсииллэринэн, хас биирдии волонтерга анаан ардахха инчэйбэт, итиигэ, тымныыга кэтэр анал таҥастары, туттар мал-сал, метроҕа босхо сылдьар карточкалары, араас омук тылларын тылдьыттарын, каарталары биэрбиттэр.
Көрсүһүү түмүгүнэн волонтердар СӨ ыччат дьыалатын уонна дьиэ кэргэн бэлиитикэтин миниистирэ Иван ЛУЦКАН волонтердарга Махтал суруктары туттарда.
Саха сирин ыччата араас аан дойдутааҕы улахан тэрээһиннэргэ кытталлара хайҕабыллаах суол, оҕолор инникитин салгыы Кытайга 2020 сылга буолар олимпийскай оонньууларга волонтердуу барар баҕа санаалаахтар.
Чэлгийээнэ Бахсырова, edersaas.ru
Ааптар хаартыскаҕа түһэриитэ, видеоҕа устуута