Саха сиринээҕи «Сайберия» хампаанньа бырагыраама толкуйдуурга 173 мөлүйүөн солкуобайы ылла
Саха сиригэр үлэлиир «Сайберия» хампаанньа 173 мөлүйүөн солкуобай аккредитивы, ол иһигэр «Восход» Венчурнай пуондаттан 150 мөлүйүөн солкуобайы ылла. Бу үбүнэн хампаанньа үлэһиттэрэ диагностическай тэрилгэ анаан мэдиссиинискэй бырагырааманы толкуйдуохтара. Бу туһунан хампаанньа бэрэстэбиитэллэрэ вице-премьер Юрий Трутневка уонна Ил Дархан Айсен Николаевка «Open innovation – 2022» стартап-тур аһыллыытыгар кэпсээтилэр.
«Билигин биһиги Герцен аатынан Национальнай институту уонна Пирогов аатынан Национальнай медико-хирургическай киини кытта бүөр резекциятын уонна тыҥа араагын тула икки улахан чинчийиини ыыта сылдьабыт. Ону сэргэ өрөспүүбүлүкэбитигэр хас даҕаны бырайыакка үлэлэһэбит. Үлэбит түмүгүнэн рентгенолог быраастарга бырагыраама комплексын оҥорон таһаарыахтаахпыт, ол ыарыыны чопчу уонна кэмигэр быһаарарга көмөлөһүөҕэ. Москватааҕы Доруобуйа харыстабылын департаменын кытта эмиэ үлэлиибит. Билигин сэртипикээти ылыыга Росздравнадзору кытта кэпсэтэ сылдьабыт», — диэн «Сайберия» хампаанньа техническэй дириэктэрэ Афанасий Аргунов кэпсээтэ.
Ил Дархан Айсен Николаев «Сайберия» хампаанньа үлэтин бу иннинэ хайҕаабыта. Кини этэринэн, инфраструктураны эрэ буолбакка, мэдиссиинэҕэ IT-технологияны сайыннарар эмиэ суолталаах.
«Билигин толкуйданар IT-бырайыактар судаарыстыбаттан улахан көмөнү ылыахтарын сөп. Манна Арассыыйа Бэрэсэдьиэнин уонна дойду бырабыыталыстыбатын көмөтүнэн улахан үлэ ыытыллар. Эрэгийиэннээҕи таһымҥа быһаарыныылары ылыммыппыт. Билэргит курдук, 300 мөлүйүөн солкуобайы бэйэбит саҕалааһыннарбытын өйүүргэ анаатыбыт, сыл бүтүөр диэри IT-паарка резиденнэригэр арыандаларын саппыппыт. Мантан да атын быһаарыныылары өссө ылыныахпыт», — диэн Айсен Сергеевич бэлиэтээн эттэ.
Ил Дархан уонна Бырабыыталыстыба дьаһалтатын пресс-сулууспата.
Андрей Сорокин хаартыската.