Бүгүн, от ыйын 12 күнүгэр, Ил Дархан Айсен Николаев Саха сириттэн Украинаҕа байыаннай анал операцияҕа баран кэлбит байыастары кытары көрүстэ. Анал операцияҕа хорсун быһыыларын иһин кинилэргэ наҕараада туттардылар.
Ил Дархан Айсен Николаев РФ национальнай гвардиятын сэриитин илиҥҥи уокуругун хамандыырын, генерал-полковнигы Игорь Голлоевы кытары “Росгвардия” байыастарын көрүстэ.
– Билигин, аан дойду үрдүнэн ил, эйэ туһугар охсуһуу бара турар кэмигэр, дойдуга бэриниилээх буолуу, сомоҕолоһуу олус улахан суолталаах. Тус бэйэм Донецкай, Луганскай Народнай Өрөспүүбүлүкэлэргэ эйэни олохтоһорго бэйэлэрин кылааттарын киллэрсибит биһиги байыастарбытынан киэн туттабын. Кинилэр хас биирдиилэрэ дойдубут бэрэсидьиэнэ, Верховнай Главнокомандующай Владимир Путин туруорбут соругун барытын чиэстээхтик толорон кэллилэр. Бүгүн бары этэҥҥэ дьиэлэригэр эргиллэн кэллилэр, чугас дьоннорун кытары көрүстүлэр, – диэн иһитиннэрэр Айсен Сергеевич.
Ил Дархан көрсүһүү кэмигэр бу соторутааҕыта Донбааска баран кэлбитин, Донецкай Народнай Өрөспүүбүлүкэ Кировскай куоратыгар Саха сирэ көмө оҥоруоҕун туһунан иһитиннэрдэ.
– Донбаас олохтоохторо дойдуларыгар ил, эйэ сотору кэминэн олохтонуоҕар бүк эрэнэллэр уонна ити Арассыыйаны кытары быстыспат ситимнээҕин өйдүүллэр. Донбаас хас биирдии олохтооҕо эһигини көмүскээччилэрин курдук көрөр. Саха сирэ Кировскай куораты чөлүгэр түһэриигэ көмөлөһүөҕэ. Дьон-сэргэ дьиэтигэр-уотугар түргэнник көһөн кэлэрин, иллээх-эйэлээх олоххо олорорун туһугар биһиги бары биир сомоҕо буоларбыт наада, – диэн этэр кини.
“Росгвардия” байыастарыгар хорсун быһыыларын иһин анал бэлиэлэри, наҕараадалары туттардылар.
Аграфена КУЗЬМИНА