Орто үөрэҕи киэҥник тарҕатар инниттэн, Арассыыйаҕа 2012 сылтан WorldSkills Russia диэн хамсааһын киирбитэ. Бу хамсааһын чэрчитинэн, сыл аайы араас компетенцияларга (көрүҥнэргэ) күрэхтэһиилэр ыытыллаллар. Куонкуруһу федеральнай уонна аан дойду таһымнаах эспиэртэр сыаналыыллар. Тустаах куонкурус түмүгүнэн, ааспыт сылга Саха сирэ Уһук Илин уокурукка маҥнайгы миэстэҕэ таҕыста. Оттон Арассыыйаҕа 10-с миэстэҕэ сылдьар.
Саха сирэ WorldSkills Russia хамсааһыҥҥа киирбитэ биэс сыл буолла. Кэлиҥҥи биэс сылтан саамай таһаарыылаах – 2017 сыл. Ол курдук, Краснодар куоракка ыытыллыбыт WorldSkills Russia күрэхтэһии финалыгар сиэтии (сыбаарка), ювелир дьыалата, рестораннай сервис, кондитер компетенцияларга кыттан, Саха сирин усудьуоннара биэс мэтээли ылары ситиспиттэрэ. Итиэннэ Абу-Даби куоракка буолан ааспыт аан дойду финалга Дьокуускайдааҕы торговай-экономическай колледжка үөрэммит, билигин Санкт-Петербурдааҕы колледж устудьуона Степан Кириллин кондитер компетенцияҕа медальон ылбыта. Ити ыйыллыбыт ситиһиилэр, о.д.а. бары түмүллэн, Саха сирин орто үөрэҕэ Арассыыйаҕа 10-с миэстэҕэ тахсарыгар көмөлөстүлэр.
Ситиһии итинэн эрэ муҥурдаммат. Ол курдук, “Региональный стандарт кадрового обеспечения промышленного роста” диэн бырайыакка Арассыыйа 20 эрэ эрэгийиэнэ сүүмэрдэнэн кыттар. Бырайыагы Стратегическай көҕүлээһин агентствота (Агенство стратегических инициатив) ыытар. Көрдөрүүгэ үлэ биэрээччилэри кытта хардарыта үлэлэһиигэ Саха Өрөспүүбүлүкэтэ Белгородскай уобалаһы кытта Арассыыйаҕа бастакы миэстэҕэ сылдьар. “Биллэн турар, итиннэ бырамыысыланнас тэрилтэлэрэ эрэ буолбакка, өҥөнү оҥорор уонна кыра даҕаны тэрилтэлэри кытта бииргэ үлэлэһиибит барыта учуоттанар”, — диэн СӨ үөрэҕин уонна наукатын миниистирин солбуйааччы Андрей Попов иһитиннэрдэ.
Биллэн туран, оччотугар орто үөрэхтэргэ куонкурус төһө үрдүгүй диэн ыйытыы күөрэйэр. Ити туһунан миниистири солбуйааччыттан туоһуласпыппар: “1990-2000 сыллар саҕаланыыларыгар, үөрэнээччи кэлбэтинэн сибээстээн, сорох үөрэх тэрилтэлэригэр миэстэ туолбат этэ. Ааспыт сылга 6,5 тыһ. миэстэҕэ 20-тэн тахса тыһ. сайабылыанньа киирдэ. Бырамыысыланнас идэлэрин таһынан, автомеханик, землеустроитель, медицинэ идэлэрэ өрүү үрдүк куонкурустаахтар. Холобур, былырыын Дьокуускайдааҕы медицинэ колледжыгар сорох идэлэргэ биир миэстэҕэ 16-17 тиийэ сайабылыанньа киирдэ. Ити чахчы улахан көрдөрүү. Уонна урукку сылларга тэҥнээтэххэ, кэлин 9-с кылаас кэнниттэн үөрэнэ кэлэр оҕо ахсаана эбилиннэ”, — диэн хоруйдаата.
Людмила ПОПОВА, “Саха сирэ” хаһыат, edersaas.ru