“Россия Аграрнай партията” Бүтүн Россиятааҕы политическай партия Саха сиринээҕи салаатын сэбиэтин уочараттаах мунньаҕар чилиэннэри сэргэ улуустардааҕы салаалар салайааччылара уонна бэрэстэбиитэллэр кытыннылар. Мунньаҕы регионнааҕы салаа бэрэссэдээтэлэ, “Туймаада” хампаанньа генеральнай дириэктэрэ Александр Васильев салайан ыытта.
Саха сиринээҕи салаа ситэриилээх кэмитиэтин салайааччыта Прокопий Старостин тэрээһин үлэ уонна инники соруктар тустарынан иһитиннэриитин кэнниттэн улуустардааҕы салаалар бэрэссэдээтэллэрэ Прокопий Окоемов (Нам), Владимир Егоров (Сунтаар), Айысен Черноградскай (Амма) уонна бэрэстэбиитэл Федор Романов (Өлүөхүмэ) отчуоттаабыттара сонуннук иһилиннэ. Кинилэр миэстэҕэ баар итэҕэстэри уонна ситиһиилэри аһаҕастык ыйдылар. Холобур, Өлүөхүмэ улууһунааҕы салаа салайааччыта Сардаана Никитина партия кэккэтин хаҥатыыга нэһилиэнньэ ортотугар элбэх тэрээһин үлэни ыытан, хамсааһыны таһаарда. Партия сэбиэтин мэктиэлээһининэн Сардаана Ивановна соторутааҕыта “СӨ тыатын хаһаайыстыбатын туйгуна” бэлиэни туппута мээнэҕэ буолбатах.
Аграрнай партия биир сүрүн соруга – аны күһүн ыытыллыахтаах Ил Түмэн быыбарыгар бары күүһү-кыаҕы хомунан тэрээһиннээхтик кыттыы. Сэбиэт онно бэлэмнэнэн, аны сайын бэс ыйыгар конференция тэрийэн ыытарга быһаарда. Ити иннинэ, муус устарга уонна ыам ыйыгар, олохтоох салаалар уочараты таһынан конференция тэрийэн, өрөспүүбүлүкэтээҕи улахан мунньахха дэлэгээттэрин талыахтара уонна бары таһымнаах быыбарга кыттар хандьыдааттарын туруоруохтара. А.Г.Васильев Аграрнай партия баар улуустарыгар партия уопсастыбаннай приемнайдарын – быыбар иннинээҕи штабтары тэринэллэригэр сорудахтаата.
Сэбиэт мунньаҕа маны тэҥэ аҕыйах хонуктааҕыта Уус Алданнааҕы салаа отчуоттуур-быыбардыыр конференциятыгар быыбардаммыт болдьоҕо бүппүт Иван Матвеев оннугар талыллыбыт саҥа бэрэссэдээтэл Степан Бочкаревы бигэргэттэ. “Мүрү Ас” потребительскай кэпэрэтиип толорооччу дириэктэрэ дуоһунастаах салайааччы быйыл кыһын улуустааҕы АККОР бэрэссэдээтэлинэн талыллан турар. Партия Таатта улууһунааҕы салаатыгар эмиэ уларыйыы таҕыста: Гаврил Петров доруобуйатын туругунан бохсолуурга көрдөһүүтүн ылынан, биир партиялаахтара “Баай Ас” ТХПК салайааччытын Семен Андросовы талбыттарын сэбиэт чилиэннэрэ биир санаанан бигэргэттилэр.
Бу күннэргэ Таатта улууһугар СӨ бырабыыталыстыбатын бэрэссэдээтэлин солбуйааччы-өрөспүүбүлүкэ Хабаровскай кыраайга бастайааннай бэрэстэбиитэлэ Георгий Никонов салалтатынан “Улуу айаннар аартыктарынан” история-этнография экспедицията тиийэн үлэлии сылдьар. Ыалдьыттар бэҕэһээ Ытык Күөлгэ кыраайы үөрэтэр музейга олохтоохтору кытта кэпсэттилэр. Бүгүн Харбалаахха, Чычымахха, Чымынаайыга сылдьар былааннаахтар. Георгий Никонов Ил Түмэн быыбарыгар Россия Аграрнай партиятын чилиэнин быһыытынан “Таатта – Томпо” уокуруктан киирсэр санаалааҕын биир дойдулаахтара биһирээтилэр. Санатан эттэххэ, экономика миниистиринэн анаммыт Денис Белозеров эмиэ Аграрнай партия чилиэнэ. Онон тыа сирин интэриэһин туруулаһар түмсүү ыйааһына күнтэн күн ыараан иһэр.
Василий НИКИФОРОВ, «Саха сирэ» хаһыат, edersaas.ru