“Россия аграрнай партията” Бүтүн Россиятааҕы политическай партия Саха сиринээҕи салаата дойдуга бастыҥ үлэлээҕинэн биллэр. Санатар буоллахха, Саха сиринээҕи салаа 2012 сыл сайыныгар саҥалыы тэриллибитэ. Ол эрээри, дьиҥнээх хамнааһын үс сыл кэнниттэн биирдэ тахсыбыта.
Ил Түмэн ааспыт быыбарыгар ытыс соттубут аграрнайдар 2015 сыл ыам ыйын 19 күнүгэр уочараты таһынан отчуоттуур-быыбардыыр конференцияны тэрийэннэр, саҥа салайааччыны туруорарга быһаарбыттара. Онно “Туймаада” хампаанньа генеральнай дириэктэрэ Александр Васильев кандидатуратын иһин бэриллибит куолас баһыйан, регионнааҕы салаа саҥа бэрэссэдээтэлинэн буолбута уонна өрөспүүбүлүкэттэн Россия аграрнай партиятын Үрдүкү Сэбиэтигэр чилиэнинэн киирбитэ. Уопуттаах хаһаайыстыбанньык-салайааччы боломуочуйатын тутаат даҕаны, бастакы дьыаланан Саха сиринээҕи Аграрнай партияны Юстиция министиэристибэтигэр регистрациялатан, сокуон күүстээбитэ.
Салаа ситэриилээх кэмитиэтин салайааччыта Прокопий Старостин бигэргэтэринэн, ити кэм иһигэр олохтоох салаа 19-тан 28-ка (өрөспүүбүлүкэ 27 улууһугар уонна Дьокуускай куоракка) итиэннэ партия чилиэнин ахсаана 900-тэн 2500-кэ диэри эбиллэрин ситистилэр. Сэбиэт 25 киһилээҕиттэн 20-тэ – улуустардааҕы салаалар салайааччылара, састаап 90 бырыһыана — үрдүк үөрэхтээх, 12 бырыһыана – дьахтар. Оттон регионнааҕы салааны бүтүннүү ылан көрөр буоллахха, чилиэн бүттүүн ахсааныттан киһи аймах кэрэ аҥаара 25 уонна 35-гэр диэри саастаах ыччат дьон 17 %-ныыны ылаллар.
Прокопий Иннокентьевич ааспыт күһүн муниципальнай уорган быыбарыгар аграрнайдар куһаҕана суохтук кыттыбыттарын бэлиэтиир. Ол курдук, нэһилиэк баһылыгын дуоһунаһыгар Аграрнайтан 19 хандьытаат турбутуттан 7 киһи талылынна, ити иһигэр 2 хандьытаат бэйэлэрэ туруорунан киирсибиттэр. Олохтоох салаалартан Александр Андреев салайааччылаах үөһээ бүлүүлэр 7 хандьытааты туруорбуттарыттан партия икки бэрэстэбиитэлэ – Быракааҥҥа Алексей Оконосов уонна Өргүөккэ Семен Николаев (иккиһин) кыайдылар. Тэҥнэбилгэ эттэххэ, өрөспүүбүлүкэ үрдүнэн хомуньуустар үһүөйэх, сиэрдээхтэр чороҥ соҕотох баһылыктаахтар.
Маны таһынан олохтоох салайыныы бэрэстэбиитэллээх уорганыгар улуус таһымыгар 1 (Кэбээйи улууһугар – Петр Дьяконов) талыллан, улуус мунньаҕар барыта 14 дьокутааттаннылар. Оттон нэһилиэктэргэ аграрнайдар 20-тэн тахса дьокутааттаннылар, 9 баһылыктаннылар уонна 3 киһи улуус баһылыгын солбуйааччынан үлэлиир. Тыа хаһаайыстыбатын бөдөҥ тэриллиилэригэр 20 чилиэн салайааччынан, бааһынай хаһаайыстыбаларга 200 киһи баһылыгынан үлэлии сылдьаллар. Ааспыт күһүҥҥү быыбарга партияттан 9 бэрэстэбиитэл быыбар хамыыһыйатыгар киирэн үлэлэстэ. Ситэриилээх кэмитиэккэ юристаабыт Гаврил Ефимов Ил Дархан Ыйааҕынан Аграрнай партия аатыттан Саха сиринээҕи киин быыбардыыр хамыыһыйаҕа чилиэнинэн ананна. Онон Аграрнай партия Саха сиринээҕи салаата уопсастыба олоҕор илэ-чахчы ыйааһыннанан иһэр.
Хаартыскаҕа: РАП Саха сиринээҕи салаатын ситэриилээх кэмитиэтин салайааччыта Прокопий Старостин предприниматель Василий Кулаковскайга (Мэҥэ Хаҥалас) партия кэккэтигэр киирбитин туоһулуур докумуону туттарар.
Василий НИКИФОРОВ, «Саха сирэ» хаһыат, edersaas.ru