Саха сирин вице-премьерэ Михаил Гуляев докторскай диссертациятын научнай сыаннаһа хаттаан бигэргэтилиннэ
Арассыыйатааҕы физическэй култуура, спорт, ыччат уонна туризм Судаарыстыбаннай университетын диссертационнай Сэбиэтэ, Саха сирин вице-премьерэ Михаил Гуляев докторскай үлэтин научнай сыаннаһын биир санаанан бигэргэттэ. Ол туһунан СИА-ҕа СӨ Бырабыыталыстыбатын анал Telegram мессенджер ханаалынан иһитиннэрдилэр.
“Михаил Гуляев эрэгийиэн таһымыгар физическэй култуураны уонна спорду сайыннарыы систиэмэтин тэрийии, салайыы уратыларыгар анаммыт докторскай үлэтэ, Арассыыйатааҕы үрдүкү аттестациялыыр хамыыһыйа көрдөбүлүн бары ирдэбилигэр сөп түбэһэр”, — диэн Арассыыйатааҕы физическэй култуура, спорт, ыччат уонна туризм Судаарыстыбаннай университетын диссертационнай Сэбиэтин 16 чилиэнэ биир санаанан быһаарыы ылыммыт.
Санатан эттэххэ, бу сыл тохсунньу 10 күнүгэр “Диссернет” холбоһук ситимин салайааччыта Андрей Заякин РФ Үөрэҕин уонна наукатын министиэристибэтигэр Михаил Гуляев педагогическай наука доктора учуонай истиэпэнин быһарга диэн үҥсүү суруйбута.
Боппуруос аһаҕас көрүүгэ тахсыар диэри, ыйыллыбыт бэрээдэк быһыытынан, бары докумуон педагогическай наука доктора, профессор Олег Попов салайааччылаах тутулуга суох экспертнэй Сэбиэккэ тиксэриллибитэ. СӨ Бырабыыталыстыбатын бэрэссэдэтээлин солбуйааччы авторофератын, докторскай диссертациятын, 80-тан тахса научнай үлэтин, 7 монографиятын сиһилии чинчийдилэр.
Диссертациялыыр Сэбиэт экспертнэй хамыыһыйа түмүгүн, учуонай истиэпэнин быһар туһунан тыллааччы Андрей Заякин тыл этиитин, диссертация ааптарын дакаастабылын иһиттэ. Салгыы научнай мөккүөргэ диссертацоннай Сэбиэт чилиэннэрэ бэйэлэрин санааларын эттилэр. Мунньах түмүгүнэн, Арасссыыйатааҕы үрдүкү аттестациялыыр хамыыһыйа Гуляев докторскай диссертацията бары ирдэбилгэ эппиэттиирин билинэргэ диэн биир санаанан быһаарыы ылыннылар.
Диссертационнай Сэбиэт, научнай чинчийии кэмигэр суруллубутун, уһулуччу суолталааҕын, научнай саҥаны киллэрии баарын, баар чахчыларга олоҕурбутун, ааптар модела быраактыкаҕа үрдүк суолталааҕын бэлиэтээбит.
Сөптөөх түмүгү Үрдүкү аттестационнай хамыыһыйаҕа ыыппыттар.
Онон, вице-премьер учуонай истиэпэнин быһар туһунан “Диссернет” ситим холбоһугун ирдэбилэ олоҕо суоҕун, научнай үлэни бары өттүнэн уонна туохтан да тутулуга суох кырдьыктаахтык көрүү дакаастаата.
Андрей Заякин Facebook бэйэтин аккаунугар суруйарынан, аһаҕас ырытыһыы кэнниттэн мөккүһээччилэр илии тутуспуттар.
Педагогическай наука доктора Михаил Гуляев алтынньы 31 күнүгэр, Хотугулуу-Илиҥҥи федеральнай университекка педагогическай уопсастыбаннаһы кытта көрсүөҕэ.
Саха иһитиннэрэр агентствота.