Саха сирин ыччата Саха АССР 100 сылыгар саҥа бырайыагы олоххо киллэрэр

Саха сирин ыччатын бырабыыталыстыбатын чилиэннэрэ Саха АССР 100 сылыгар бэйэлэрин этиилэрин уонна бырайыактарын киллэрдилэр. Быйылгы сылга өрөспүүбүлүкэ ыччата култуура, успуорт, үөрэх, тыа хаһаайыстыбатын, туур айан (туризм) салаатыгар, айар ыччаты уонна эдэр ыалы өйүүр бырайыактарга 20-тэн тахса тэрээһини олоххо киллэрэр былааннаах. 

“Саха АССР 100 сыла Саха сиригэр үйэ кирбиитинэн уонна устуоруйа саҥа суолун саҕаланыытынан дириҥ өйдөбүллээх. Хас биирдии олохтоох бэйэтин кылаатын киллэрэригэр кыах биэрии суолталаах”, — диэн өрөспүүбүлүкэ Ил Дархана Айсен Николаев бэлиэтээбитэ.

Үбүлүөйдээх тэрээһиннэргэ болҕомтону тардар уонна өрөспүүбүлүкэ ыччатын сыһыарар инниттэн, Ыччат бырабыыталыстыбата кэккэ бырайыактары киллэрэр. Олортон биирдэстэринэн — “Саха сирин билиэтэ” национальнай колориттаах билиэт дизайнын оҥоруу куонкуруһа.

Куонкурус өрөспүүбүлүкэ туһааннаах министиэристибэлэрин уонна тэрилтэлэрин өйөбүлүнэн ыытыллар. Кыайыылаах дизайнын “Аэропорты Севера” авиабилиттэригэр, ону тэҥэ, филармония уонна тыйаатырдар билиэттэригэр туһаныахтара.

“Куонкуруһу бу сыл тохсунньутугар биллэрбиппит, үлэлэри олунньу 26 күнүгэр диэри ылабыт. 16-35 саастаах ыччат кыттар. Куонкуруска судаарыстыбаннай диэйэтэллэр, устуоруйа түгэннэрэ, Саха сирин айылҕата ойуулаах үгүс үлэлэри киллэрэллэр. Үлэлэри тэрээһиҥҥэ сыһыарыллыбыт Тырааныспар, Ыччат министиэристибэлэриттэн уонна туһааннаах тэрилтэлэртэн састааптаах хамыыһыйа сыаналыаҕа”, — диэн Ыччат бырабыыталыстыбатын бэрэссэдээтэлэ Пётр Бурнашев кэпсээтэ.

Саха АССР 100 сылын иитинэн Ыччат бырабыыталыстыбата олоххо киллэрэр бырайыактарыттан өрөспүүбүлүкэ эдэр учууталларыгар уонна педагогтарыгар аналлаах граннаах куонкуруһу, Google каартаҕа нэһилиэктэр уулуссаларын көстүүтүн киллэриини, «Якутия-2122» стратегиятын оҥорууга ыччаттарга үөрэх пуорумун ааттаталыахха сөп.

Ону тэҥэ, быйыл Саха сиригэр Ийэ сылынан Ыччат быраабыыталыстыбата эдэр төрөппүттэргэ иһитиннэрэр матырыйааллары бэлэмниир. Көҕүлээһини Ил Дархан ийэлэри уонна өрөспүүбүлүкэ уопсастыбаннай хамсааһыннарын бэрэстэбиитэллэрин кытта көрсөрүгэр өйөөбүтэ.

СӨ Ил Дарханын уонна СӨ Бырабыыталыстыбатын пресс-сулууспата.