Саха сирин волонтердара Путины кытары кэпсэтиигэ кытыннылар (Видео)
Арассыыйа бэрэсидьиэнэ Владимир Путин коронавирус пандемиятын кэмигэр кыһалҕалаахтарга көмөлөһөөччүлэри түмэр, сомоҕолуур #БАРЫБИИРГЭ Бүтүн Арассыыйатааҕы аахсыйа көхтөөх кыттааччыларын кытары куйаар ситимин нөҥүө кэпсэттэ.
Бу кэпсэтиигэ волонтердар, сыстыганнаах ыарыыны эмтиир быраастар, дьаҥтан харыстанарга анаан араас тэриллэри оҥорор тэрилтэлэр бэрэстэбиитэллэрэ, хаан биэрэр донордар кытыннылар.
Онлайн-көрсүһүүгэ бэрэсидьиэн Владимир Путин кыһалҕалаах кэмнэргэ дьоҥҥо-сэргэҕэ көмөлөһө сылдьааччыларга махтанна, ону сэргэ, волонтердар хамсааһыннарыгар аан бастаан кыттыспыттары тоһоҕолоон бэлиэтээтэ. Кини бу үлэҕэ көхтөөх кыттааччылар этиилэрин болҕойон иһиттэ уонна кэммиэрчэскэйэ суох тэрилтэлэргэ көмөҕө эбии туох миэрэлэр оҥоһуллуохтаахтарын иһитиннэрдэ. Кини коронавируһу утары охсуһууга бэрэсидьиэн гранын пуондатыттан социальнай көҕүлээһиннэри өйөөһүҥҥэ үс миллиард солкуобай бэриллиэ диэтэ.
Бэрэсидьиэн быһа сибээһигэр Арассыыйа үрдүнэн 60 киһи кыттыбытыттан, Саха сириттэн Артем Иванов, Валентина Сметанина уонна Роберт Иванов кыттар улахан чиэскэ тигистилэр.
Артем Иванов 25 саастаах. Кини уопсастыбаннай үлэнэн көхтөөхтүк дьарыктаммыта алта сыл буолбут. Волонтердары кытары үлэлиир Кииҥҥэ, ХИФУ үөрэнэ сылдьан, устудьуоннар биир идэлээх сойуустарын тэрилтэтигэр үлэлэспит. Бүгүн кини, атын волонтердар курдук, күн ахсын кырдьаҕастарга, кыамматтарга, инбэлииттэргэ, кэлэллэрэ-бараллара хааччахтаах дьоҥҥо, соҕотоҕун олорооччуларга итиэннэ коронавирус дьаҥыттан уустук балаһыанньаҕа түбэспиттэргэ туох баар кыһамньытын ууран көмөлөһөр.
—Бу уустук кэмҥэ дьоҥҥо-сэргэҕэ өйөбүл буолар, көмөлөһөр, кыһалҕаларын быһаарсар, дьон туһугар туох баар кыһамньыларын ууран үлэлиир олус аһыныгас уонна эр санаалаах, хорсун-хоодуот дьону кытары бииргэ үлэлиирим миэхэ улахан чиэс, — диир Артем.
Кулун тутар 20 күнүттэн волонтердар өрөспүүбүлүкэ үрдүнэн барыта 13371 сайаапканы уталыппакка толорбуттар. Билигин барыта 2559 волонтер бу уустук кэмҥэ туох баар болҕомтотун ууран, сомоҕолоһон, хардарыта сибээстээхтик үлэлиир-хамсыыр. Кинилэр күн ахсын аһы-үөлү, эми-тому аадырыстарынан тиэрдэн биэрэллэрин таһынан, өссө бөҕү-саҕы дьиэттэн таһаарыыга, ыты күүлэйдэтиигэ, о.д.а. араас үлэҕэ кыһамньылаахтык, эппиэтинэстээхтик ылсаллар.