Волонтер-медиктэр Саха сиринээҕи салаалара дойдуга бастыҥ буоллулар.
Арассыыйатааҕы күөн күрэс ыытылынна, «Лучшее региональное отделение 2021» диэн. Күрэс ирдэбилигэр нэһилиэнньэтэ 400-тэн 1 мөл. тиийэ буоллуохтаах диэн ыйыллар. Манна Саха сирин волонтер-медиктэрин бастыҥынан ааттаатылар.
Куонкурус «Биһиги бииргэ» («Мы вместе») норуоттар икки ардыларынааҕы гражданскай пуорум иитинэн ыытыллар. Норуоттар икки ардыларынааҕы пуорум Москубаҕа ахсынньы 2-5 күннэригэр буола турар. Манна социальнай бииргэ үлэлээһин тирэхтээхтик сайдарыгар сыал-сорук туһаайыллар.
Санатан эттэххэ, волонтер-медиктэр пандемия кэмигэр, 2020 сыл кулун тутартан, 60 саастарын ааспыт уонна доруобуйаларыгар хааччахтаах дьоҥҥо көмөлөһөллөр. Манна ХИФУ, Дьокуускайдааҕы мэдиссиинэ кэллиэһин устудьуоннара уонна бэйэлэрин баҕаларынан көмөлөһөөччүлэр бааллар.
«Волонтер-медиктэр» эрэгийиэннээҕи салаалара, маны сэргэ, чөл, чэгиэн олоҕу киэҥник тарҕатар соруктаах араас бырайыактары олоххо киллэрэр. Холобур, доруобуйа харыстабылыгар, чөл олоххо туһуламмыт лиэксийэлэри тэрийэллэр, мэдиссиинэ тэрилтэлэригэр көмөлөһөллөр, донордааһыны дьон өйдүүрүн, билэрин курдук киэҥник сырдаталлар, «СТОП ВИЧ», доруобуйа харыстабылын тиэмэтигэр куйаар ситиминэн лиэксийэлэри тэрийэллэр.