Арассыыйа култууратын киэҥ эйгэтигэр биир тарбахха баттанар «Саха сирин виртуозтара» өрөспүүбүлүкэ скрипачтарын судаарыстыбаннай ансаамбыла былырыын 25 сыллаах үбүлүөйүн бэлиэтээбитэ.
edersaas.ru
Бу суолталаах үбүлүөйүнэн сибээстээн ансаамбыл былырыын Мексикаҕа, АХШ-га, Соҕуруу Кэриэйэҕэ, Арассыыйа киин куораттарыгар саха норуотун ускуустубатын чаҕылхайдык билиһиннэрбитэ. 25 сыл тухары бу, нууччалыы эттэххэ, «легендарнай» дэнэр айар кэлэктиипкэ планета араас кэнтиниэннэригэр мөлүйүөнүнэн көрөөччү дохсун ытыс тыаһын бэлэхтээбитэ.
Быйыл «Саха сирин виртуозтара» ансаамбыл АХШ-га тиийэн гостуруоллуу сылдьан, аан дойдуну аймаабыт сэбиргэхтэтэр дьаҥ эпидиэмийэтиттэн сылтаан, былаанын уларытарга күһэлиннэ. Бу туһунан СӨ Муусука үрдүкү оскуолатын ректора, СӨ култууратын үтүөлээх үлэһитэ Надежда Зайкова кэпсиир:
— «Саха сирин виртуозтара» скрипачтар ансаамбылын кыттааччыларын састаабыгар биһиги оскуолабыт айар үлэһиттэрэ уонна үөрэнээччилэрэ бааллар. Скрипачтар ыраах гостуруолга барыахтарын иннинээҕи кэнсиэртиир бырайыактарын икки ыйы быһа бэлэмнээбиттэрэ. Саха сириттэн кулун тутар саҥатыгар аттаммыттара. Эмиэрикэҕэ кулун тутар 10 күнүгэр көппүттэрэ. Хомойуох иһин, аан дойдуга барытыгар коронавирус эпидемиятыттан харыстаныы ыйдара биллэриллибиттэринэн сибээстээн, ансаамбыл гостуруолун тохтотон, дойдутугар төнүннэ. Бүгүн айар кэлэктиип Дьокуускайга көтөн кэллэ. Скрипачтар тута эмчиттэргэ көрдөрүнээт, обсервакка харантыыҥҥа киирдилэр. Доруобуйаларын туруга этэҥҥэ. 14 хонук устата бэйэлэрин кэтэнэн көрүөхтэрэ.
Ити курдук, хас биирдии омук сириттэн кэлбит дьон, сөмөлүөттэн түһээт, обсерваттарга киирэн, доуробуйаларын туругун бэрэбиэркэлэтэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — «Саха сирн виртуозтара» ансаамбыл саайтыттан.