Уопсастыба Үөрэх уонна наука Эдэр саас

Саха сирин тутар этэрээттэрэ сайыҥҥы үлэҕэ туруннулар

Үгэс быһыытынан Россия күнүгэр Дьокуускайга өрөспүүбүлүкэ устудьуоннарын тутар этэрээттэригэр сайыҥҥы үлэ семестрэ аһылынна.

Бу семестргэ устудьуоннар тутар этэрээттэрин байыастарыгар 5055 саҥа үлэ миэстэтин бэрилиннэ. Устудьуоннар Жатайга суудуна верфэтин тутууга, национальнай бырайыактарынан социальнай суолталаах эбийиэктэри тутууга, баһаары умуруорууга, тыа хаһаайыстыбатын хайысхатыгар уонна оҕо лааҕырдарыгар баһаатайынан итиэннэ сервис өҥөлөрүгэр үлэлиэхтэрэ. Тыһыынчанан устудьуоннар араас идэлэргэ үөрэммиттэр: каменщик, бетонщик, малярик, слесарь уо. д. а. диэн СИА иһитиннэрэр.

«Россия устудьуонарын этэрээтэ» Саха сирин регионнааҕы салаатын ыччат уопсай Россиятааҕы уопсастыбаннай тэриллии салайааччыта Айсен Соловьев биллэрбитинэн, Саха сирин устудьуоннарын этэрээттэрэ бүтүн Россиятааҕы, уокуруктааҕы, эрэгийиэннэр икки ардыларынааҕы таһымнаах үлэ бырайыактарыгар кыттыахтара.  Кини бэлиэтээбитинэн  СӨ Ыччат дьыалаларыгар уонна социальнай коммуникацияларга министиэристибэтэ, СӨ үөрэҕин уонна наукатын министиэристибэтэ уонна СӨ Бырабыыталыстыбата буолан биир систиэмэлээхтик үлэлээбиттэрин түмүгэр устудьуоннар бэлэмнэниилэрин таһыма үрдүк.

Ааспыт сылга  Ил Дархан Айсен Николаев сайыҥҥы үлэ семестрэ арыллыытын Устдьуоннар этэрээттэрин скверигэр бэлиэтиир   саҥа үгэһи олоххо киллэрбитэ.  СӨ Ыччат дьыалаларыгар уонна социальнай коммуникацияларыгар миниистирэ Степан Саргыдаев быйылгы  үлэ сезонун арыйда.   Саҥа үлэ семестрэ арыллыытын үөрүүлээх чааһыгар устудьуоннар этэрээттэрин былааҕа ыйанна. Бу бочуоттаах дьыаланы «Тыгын Дархан сыдьааннара» устудьуоннар тутар этэрээттэрин хамыһаара Михаил Петров уонна  «Саха сиринээҕи устудьуоннар этэрээттэрин бастыҥ байыаһа» СӨ Ил Дарханын бириэмийэтин хаһаайына Алена Акакиева толордулар. Ыччаты үлэҕэ, дойдуга бэриниилээх буолууга уонна култуураҕа иитиигэ кылаатын, устудьуоннар этэрээттэрин хамсааһынын сайыннарыыга өҥөтүн, Россиятааҕы устудьуоннар этэрээттэрин ситиһиилэрин тарҕатыы уонна имиджин оҥоруу иһин  Россия устудьуоннарын этэрээттэрин бочуоттаах бэлиэтинэн Саха сирин эрэгийиэннээҕи салаатын устудьуоннарын этэрээтин бэтэрээнэ Владимир Петров наҕараадаланна.  Санатан эттэххэ, 2020 сыл түмүгүнэн, Саха сирин устудьуоннарын этэрээтэ Россияҕа 10 бастыҥ этэрээт иһигэр киирбитэ.

 

edersaas.ru

0
0