Саха сирин урбаанньыттара Кэриэйэ хампаанньаларын кытта үлэлэһиэхтэрэ

СӨ Атыы-эргиэн балаатата Саха сирин урбаанньыттарын өйүүр былаанын, чуолаан, оҥорон таһаарбыт бородууксуйаларын тас дойдуга батарыыны олоххо ситиһиилээхтик киллэрэн иһэр. Тустаах Балаата уонна урбаанньыттар үптэринэн-харчыларынан  уонна бородууксуйаларын тас дойдуга таһаарыынан дьарыктанар ааҕыныстыба көҕүлээбит бырайыактара, саҕалааһыннара куруук үтүө түмүктэрдээх буолар.

Бу туоһутунан соторутааҕыта Саха сирин урбаанньыттара Соҕуруу Кэриэйэ биллэр HYUNDAI (Elevator co.ltd.), Shindong (Enercom), KCC Сorporation, UCP Co, Limited  хампаанньаларыгар сырыылара буолар. Тустаах хампаанньалар бородууксуйалара Соҕуруу Кэриэйэҕэ эрэ буолбакка, аан дойдуга тиийэ сураҕыраллар.
Сеул куорат хампаанньаларын кытта дьыалабыай көрсүһүү түмүгүнэн хас да экспортнай сөбүлэҥ түһэрсилиннэ. Ордук “Сиберлит” ХЭТ сахалыы көмүс оҥоһуктары Соҕуруу Кэриэйэтээҕи «Ltda ltd» хампаанньаҕа экспортыыр 1 мөл. дуоллар суумалаах сөбүлэҥнэрин бэлиэтиэххэ сөп.

edersaas.ru