Саха сирин улахан этэрээтэ уонна үс миэдик баҕа өттүнэн Украинаҕа анал дьайыыга барда
Саха Өрөспүүбүлүкэтин устуоруйатыгар аан бастакытын бөдөҥ этэрээт Украинаҕа, доҕордуу өрөспүүбүлүкэлэри босхолуур, дойдуну бөҕөргөтөр соруктаах баҕа өттүнэн анал дьайыыга аттанна.
SakhaLife суруйарынан, баҕа өттүнэн барбыт сүүс киһиттэн үһэ миэдик.
Ортопед-травматолог быраас, Өрөспүүбүлүкэтээҕи 1-кы нүөмэрдээх балыыһа – Мэдиссиинэ национальнай киинин травматологияҕа салаатын сэбиэдиссэйэ Сергей Васильев иһитиннэрбитинэн, кини уонна Өлөөннөөҕү киин балыыһа кылаабынай бырааһа Назар Петров патриотическай санааттан анал дьайыыга баран эрэллэрин этэр.
— Биир дойдулаахтарбыт, эйэлээх олохтоохтор уонна оҕолор олохторун харыстыырга, доруобуйаларыгар биһиги көмөбүт эрэйиллэрин билээт да, тута анал байыаннай дьайыыга барарга сөбүлэспиппит. Кэллиэгэлэрбитин кытта Украинаҕа соругу толорууга балачча уопуттаахпыт. Назар киэҥ хайысхалаах быраас: хирург уонна анестезиолог-реаниматолог. Николай – хонуу үлэтигэр уопуттаах биэлсэр, — диэн травматолог Сергей Петрович иһитиннэрэр.
Хирург уонна реаниматолог Назар Петров хас биирдии гражданин баҕа өттүнэн көмөлөһөр, үлэлиир бырааптааҕын эбэн этэр.
— Биир суолталаах санааны этиэхпин баҕарабын. Эйэлээх олох иһин билигин дойду баһылыга ыытар ис бэлиитикэтин өйүөх тустаахпыт. Биһиги кэллиэгэлэрбитин кытта Владимир Владимировиһы, Сергей Кужугетовиһы, ону тэҥэ, өрөспүүбүлүкэбит салалтатын өйүүбүт. Тус бэйэм ааппыттан доруобуйа харыстабылын миниистиригэр Лена Афанасьеваҕа, СӨ Байыаннай дьайыы бэтэрээннэрин ассоциациятыгар үрдүк эппиэтинэстээх – бииргэ сулууспалааччыларбыт, биир дойдулаахтарбыт уонна эйэлээх олохтоохтор доруобуйаларын араҥаччылыырга туруоруллубут соругу толорууну биһиэхэ эрэммиттэрин иһин махтанабын. Биһиги Сергей Петровичтыын анал байыаннай дьайыыга харчы туһугар барбаппытын чопчу билэбин. Элбэх идиэйэлээх дьоммут. Анал дьайыыттан кэлэн баран байыаннай төлөбүрүм аҥаарын социальнай бырайыактарга ыытыаҕым, — диэн Назар Петров этэр.
Назар Иннокентьевич настаабынньыктарыгар – бэрэпиэссэр Александр Потаповка, Мэдиссиинэ национальнай киинин реанимацияҕа сэбиэдиссэйигэр Геннадий Григорьевка уонна эпэрээссийэ салаатын кылаабынай сиэстэрэтигэр Любовь Соболевскаяҕа өйөбүллэрин иһин махтанар.
Ону тэҥэ, дьоруойдар дьиэ кэргэттэрэ өйдөөбүттэрин иһин махтаналлар.
Эрдээксийэ билэр-көрөр, СӨ Доруобуйа харыстабылын министиэристибэтигэр чугас киһини кытта сибээстэһэ сырытта. Кини этэринэн, Петров уонна Васильев Украинаҕа анал дьайыыга барар бастакы гражданскай быраастар буолаллар. Бу иннинэ быраастар буолбакка, анал подразделение мэдиссиинискэй үөрэхтээх дьоно биирдиилээн бараллар эбит.
SakhaLife Саха сириттэн баҕа өттүнэн барар батальоҥҥа уонна быраастарга ситиһиин баҕарар. Бэйэҕитин уонна бииргэ сулууспалыыр дьоҥҥутун харыстааҥ. Этэҥҥэ эргиллэн кэлиҥ!