2021 сылга Саха сиригэр тыа хаһаайыстыбатыгар, ол иһигэр туорахтаах аһылыкка, уоҕурдууга, үүнээйилэри харыстыыр эмтэргэ саҥа субсидия олохтонуоҕа. Бу туһунан, СӨ Тыатын хаһаайыстыбатын миниистирин солбуйааччы Василий Афанасьев Ил Түмэн төгүрүк остуолугар эттэ.
edersaas.ru
Ил Түмэн тыа сиригэр уонна аграрнай бэлиитикэҕэ кэмитиэтэ, «Ил Түмэн» Издательскай дьиэ» «2021 сылга тыа хаһаайыстыбатыгар киириэхтээх саҥа уларыйыылар тустарынан» төгүрүк остуол ыыттылар.
Төгүрүк остуол кыттыылаахтара «улуустарга уонна куорат уокуруктарыгар тыа хаһаайыстыбатын сайдыытыгар туспа болумуочуйаны биэрии туһунан» СӨ сокуонун тула дьүүллэстилэр.
Саҥа субсидиянан, ынах иитэр тус көмө хаһаайыстыбалаах дьоҥҥо биир төбөҕө 35 тыһыынча солкуобай бэриллиэҕэ.
—-Быйылгы сыллааҕы тарыыбынан, ол эбэтэр, 45 солкуобайынан, хаһаайыстыбалаах киһи 800 кг үүтү туттардаҕына, сыллааҕы дохуота 36 тыһыынча солкуобай буолар. Мантан кини 14 тыһыынчаны бэтэринээрдэргэ төлүүр. Ол иһигэр, быһыы, бэтэринээр ыспыраапката, «Меркурий» систиэмэҕэ киирии о.д.а. бааллар. Инньэ гынан, бүтэр уһугар кини илиитигэр 22 эрэ тыһыынча хаалар. Онон, биһиги тыа киһитэ 800 кг үүтү толору туттарбатар даҕаны, 35 тыһыынчаны биир төбөҕө ыллын диэн уларытыыны Ил Дархаҥҥа көрүүгэ биэрдибит, – диэн Василий Афанасьев быһаарда.
Василий Афанасьев, маны таһынан, тыа хаһаайыстыбатын үөрэтэр исписэлиистэр, учуонайдар биэс сыл ахсын тыа хаһаайыстыбатын сайдыытыгар саҥа көрүүлэри, систиэмэлэри киллэрэллэрин бэлиэтээтэ.
Саҥа субсидия туорахтаах култуураны, уоҕурдууну, эдэр сүөһүнү, үүнээйини харыстыыр эмтэри, дьиэ көтөрдөрүн, тигээйилэри, балыктары, элбэх сыллаах үүнээйилэри, тыа хаһаайыстыбатын кыылларын иитиигэ, тыа хаһаайыстыбатын тэпилииссэлэрин атыылаһыыга туһаныллыан сөп. Ону таһынан, айылҕаттан тутулуктаах араас биричиинэлэртэн тыа хаһаайыстыбатын оҥорон таһаарар бородууксуйалары сүтэриигэ, толук буолуон сөп.