Саха сирин Тутууга министиэристибэтэ социальнай эбийиэктэри үлэҕэ киллэриитэ — саҥа былаастар бастакы сылларын түмүгэ

РФ Бэрэсидьиэнэ Владивостокка ыытыллар Илиҥҥи экэнэмиичэскэй форум кыттыылаахтарыгар эҕэрдэтигэр “Арассыыйа Уһук Илинэ бүттүүн национальнай хабааннаах соругунан буолар” диэбитэ.

“Арассыыйа Уһук Илинин сайыннарыы, экэнэмиичэскэй уонна инновационнай кыаҕын бөҕөргөтүү, дьон олоҕун уйгутун үрдэтии – дьиҥнээх уопсай национальнай соругунан буолар”, — диэн Владимир Путин бэлиэтээтэ.
Саха сирин бырабыыталыстыбатын бэрэссэдээтэлин солбуйааччы Кирилл Бычков саныырынан, бу бүгүн судаарыстыба баһылыга туруорбут стратегическай соруга, чуолаан, эрэгийиэн былаастарын тутуу уонна олорор уонна социальнай инфраструктура объектарын үлэҕэ киллэриигэ эрэгийиэн былаастарын эппиэтинэстэрин үрдэтэр.
“Саха сирин Тутууга министиэристибэтин былаанынан, өрөспүүбүлүкэҕэ сыл бүтүөр диэри социальнай инфраструктура 56 объега киириэхтээх. Бу министиэристибэ нөҥүө 12 муниципалитекка 14 эбийиэги “Демография”, “Үөрэхтээһин” уонна инвестиционнай бырагыраама көмөтүнэн олоххо киллэриэхтэрэ. Ону таһынан Госсакаасчыт сулууспатын нөҥүө 10 муниципалитекка 11 объект киириэҕэ. Маны сэргэ судаарыстыба уонна чааһынай бииргэ үлэлээһиннэрин түмүгэр 68 эбийиэк киириэхтээх”, — диир Кирилл Бычков.
“Арассыыйа Бэрэсидьиэнин ыам ыйынааҕы ыйааҕын толоруунан өрөспүүбүлүкэҕэ национальнай бырайыактары олоххо киллэриигэ үлэ ыытыллар. Манна олоҕуран олохтоох салайыныы уорганнарын кытта хапытаалынай тутуу 14 эбийиэгин 12 муниципальнай тэриллиигэ киллэрэр соруктаахпыт”, — диэн бырабыыталыстыба бэрэссэдээтэлин солбуйааччы иһитиннэрэр. Ону сэргэ “Демография” национальнай бырайыак чэрчитинэн 970 миэстэлээх 10 дьыссаат үлэлиэхтээх.
Оҕо саадтара Хаҥаласка, Горнайга, Намҥа, Тааттаҕа (уопсайа 98 миэстэ), Чурапчыга, Үөһээ Бүлүүгэ, Томпоҕо ситэриллиэхтээхтэр. Покровскайга уонна Төлөйгө таас дьыссааттар, атыттар чэпчэки конструкциялаах матырыйаалларынан тутуллаллар.
“Ону сэргэ Дьокуускайга элбэх кыбартыыралаах дьиэлэр бастакы этээстэригэр 113 миэстэлээх уһуйааны киллэриэхтэрэ.
“Демография” национальнай бырайыагынан “Спорт – олох нуормата” бырайыагы олоххо киллэрии чэрчитинэн Жатайга сөтүөлүүр бассейны тутууну былаанныыллар, — диэн Кирилл Бычков холобурдуур. – Кинилэри сэргэ Ньурба Антоновкатын олохтоохторо спорт саалатын кэтэһэллэр. Быйыл балаҕан ыйыгар Амма улууһун Бөтүҥүгэр 220 оҕо үөрэнэр оскуолата аанын тэлэччи аһыаҕа. Ону тэҥэ Мэҥэ Хаҥалас Петровкатыгар 220 миэстэлээх оскуола бу сыл бүтүүтэ киириэҕэ”.
Онон Тутуу министиэристибэтэ сыл бүтүөр диэри уопсайа социальнай инфраструктура 56 эбийиэгин тутан үлэҕэ киллэриэхтээх.
”Былааннаммыт тутуулары үлэҕэ киллэрии 2018 сыллаахха Саха сирин Ил Дарханын Айсен Николаев Анал этиитигэр туруорбут соруктарын толорууга туһуламмыта. Бүгүн судаарыстыба баһылыга эрэгийиэннэргэ туруорбут стратегическай соруга – дьон олоҕун, Уһук Илин олохтоохторун олохторун хаачыстыбатын үрдэтии”, — диэн Кирилл Бычков түмүктээтэ.
Саха сирин Бырабыыталыстыбатыгар Инвестиционнай-тутуу блогун сүрүннүүр вице-премьер өрөспүүбүлүкэ Тутууга министиэристибэтигэр албыннаппыт дьиэ туттарааччылар интэриэстэрин көмүскээһин, хаарбах дьиэттэн көһөрүү, тулаайахтары, Аҕа дойду Улуу сэриитин бэтэрээннэрин олорор дьиэнэн хааччыйыы эппиэттээх соруга турарын санатта.

СӨ бырабыыталыстыбатын бэрэссэдээтэлин солбуйааччы сэкирэтэрийээтэ.

Хаартыска: интэриниэттэн