Саха сирин тэйиччи сытар сэлиэнньэлэригэр тиийээччилэр коронавируска экспресс-тест туттарыахтара
Тэйиччи сытар нэһилиэнньэлээх пууннарга коронавирус тиийбэтин туһугар тугу гыныахха?
Оройуоннар кииннэриттэн уонна куораттартан тэйиччи сытар нэһилиэнньэлээх пууҥҥа тиийээччилэри ИФА уонна ИХА ньыматынан коронавируска экспресс-тестэри туттаттарыахтара. Бу сылы эргиччи сырыыта, суола-ииһэ суох олорор сэлиэнньэлэргэ инфекцияны киллэрбэт туһугар ыытыллар, диэн өрөспүүбүлүкэ баһылыга Айсен Николаев суһал ыстаап уочараттаах мунньаҕар иһитиннэрдэ диэн өрөспүүбүлүкэ Ил Дарханын уонна Бырабыыталыстыбатын пресс-слууспата иһитиннэрэр.
Айсен Николаев ааспыт сууккаҕа Саха сиригэр дьаҥҥа хаптарыы 214 түгэнэ бэлиэтэммитин туһунан иһитиннэрдэ. Дьокуускайга балаһыанньа сыыйа туруктаах буолан эрэр, бүгүн манна 110 киһи ыалдьыбыт. Кини этэринэн, ыарахан ыарыһах уопсай ахсаана аччыыр, стационардарга аһаҕас миэстэлэр бааллар. Эминэн хааччыллыы оннун-тойун булла.
Николаев Өлөөн оройуонун Солоҕон национальнай нэһилиэгин Ээйик сэлиэнньэтигэр үөскээбит балаһыанньаттан долгуйарын биллэрдэ. Бу уустук суоллаах-иистээх сиргэ коронавирус дьон кыһыҥҥы суолунан сырыылара саҕаламмытын кэннэ тиийдэ. Атын сэлиэнньэлэргэ маннык балаһыанньа хатыламматын туһугар кэлбит дьону барытын бэрэбиэркэлиэххэ, ИФА уонна ИХА ньыматынан тестээһини ыытыахха диир баһылык.
Өрөспүүбүлүкэ баһылыга коронавирус дьаҥар сутуллубут ыарыһахтары кытта үлэ иһин мэдиссиинэ үлэһиттэригэр төлөбүр тиһигин уларыйыытын боппуруостарын хонтуруолга ылан, үлэһиттэргэ өйдөтөр-биллэрэр үлэни ыытарга сорудахтаата. Саҥа дьыл иннинэ төлөбүрдэр хойутааһына суох тиэрдиллиэхтээхтэр, диэн бэлиэтээтэ.
Ил Дархан суһал ыстаап чилиэннэрин этиилэрин иһиттэ.
Өрөспүүбүлүкэ вице-премьерэ Ольга Балабкина кэлэр нэдиэлэҕэ коронавируһу утары саҕаланыахтаах вакцинацияны кэпсээтэ. Бу күннэргэ өрөспүүбүлүкэҕэ маннык 200 доза кэлиэҕэ. Прививкэни бастаан мэдиссиинэ үлэһиттэрэ, онтон социальнай үлэһиттэр ылыахтара.
Саха сирин кылаабынай санитарнай бырааһын солбуйааччы Изабелла Самойлова ОРВИ-нан уонна кириибинэн ыалдьыы 10 бырыһыанынан элбээбитин бэлиэтээтэ. Кини этэринэн, ыалдьыы сыыйа үксүүр, сүрүннээн оҕолортон саҕаланна. Маныаха вакцина иккис партията бары оройуоннарга тиэрдилиннэ. Сэтинньи 19-20 күннэригэр дозаларын ылбыттар бааллар. Кинилэр ортолоругар – Нам, Үөһээ Бүлүү, Бүлүү, Горнай, Хаҥалас, Чурапчы оройуоннара.
ОРВИ уонна кириип быһыытын тиэмэтин салгыырыгар доруобуйа харыстабылын миниистирэ Елена Борисова Дьокуускайга быһыыны оҥоруу хампаанньатыгар быстах пууннар тэриллэллэрин эттэ. Дьон быһыыны эргиэн кииннэригэр уонна атын уопсастыбаннай сирдэргэ ылыахтарын сөп. Саха сирин үрдүнэн былааннаммыт 60 бырыһыан нэһилиэнньэттэн быһыыны оҕолор 89 % уонна улахан дьон 73 % ыллылар.
СИА.
Бэлэмнээтэ Женни Стрюкова
Хаартыска: тустаах саайтан