Саха сирин технологтара байыаннай тиэхиньикэни тепловизордартан харыстыахтара
Атырдьах ыйын 19 күнүгэр Москваҕа «Армия-2022» байыаннай-тиэхиньиичэскэй форум кэмигэр Саха сирин «Хоту Тент» хампаанньата уонна «Эра» диэн байыаннай инновационнай технополис бииргэ үлэлиир туһунан сөбүлэҥ баттастылар. Хампаанньалар исписэлиистэрэ бииргэ научнай чинчийиилэри оҥоруохтара.
Докумуон баттаһыытыгар Ил Дархан Айсен Николаев кытынна. Кини: «Бу докумуон биһиги инновацияларбыт сайдыыларын түстүүр. «Хоту Тент» хампаанньа толкуйдаабыта көмүскүүр технологияларга кэккэ миэстэни ыларыгар эрэнэбин», — диир.
Саха сиригэр 2017 сыллаахха тэриллибит «Хоту Тент» хампаанньа тоһуттар тымныыттан тиэхиньикэни көмүскүүргэ анаан араас идиэйэлэри толкуйдуур. Кинилэр оҥорор матырыйааллара тыалтан, күн уотуттан көмүскүүр кыахтаах, ону таһынан бөҕөтүнэн уонна тупсаҕайынан аатырар. Саха сирэ оҥорон таһаарар матырыйаала байыаннай усулуобуйаҕа тиэхиньикэни көмүскүүргэ-харыстыырга туттуллуон сөп.
Бу матырыйааллар тиэхиньикэни түүҥҥү кэмҥэ, ыраахтан көрөргө тепловизордарга көстөрүн аччатыахтарын сөп.
Ил Дархан уонна бырабыыталыстыба дьаһалтатын пресс-сулууспата.