«Саха сирин талааннара» куонкуруска сайаапканы тутуу икки нэдиэлэнэн — алтынньы 26 күнүгэр түмүктэниэҕэ. Билиҥҥи туругунан, 1000-ттан тахса киһи Арассыыйа уонна аан дойду бастыҥ үөрэх кыһаларыгар үөрэнэр грант иһин күрэхтэһэргэ бэлэмнэрин биллэрдилэр.
Сонун күрэскэ Өрөспүүбүлүкэтээҕи клиническэй балыыһа эпидемиолог бырааһа Мария Васильева кыттарга сананна.
«Мин «Саха сирин талааннара» куонкуруска бэйэм күүспүн, билиибин уонна сатабылбын тургутан көрөөрү кыттарга сананным. Бу бэйэни көрдөрөргө, үрдүк таһымнаахпын биллэрэргэ кыах буолар. Маны таһынан, куонкуруска кыттыым миэхэ саҥа билиини-көрүүнү аҕалыа, саҥа саҕахтары арыйыаҕа. Билигин биир хайысханан эрэ киэҥ билиилээх буолуу — эргэрбит өйдөбүл. Үлэм таһынан өссө элбэҕи билиэхпин баҕарабын», — диир Мария.
Маннык санаалаах, сыаллаах, талааннаах дьоҥҥо анаан СӨ Бырабыыталыстыбата «Саха сирин талааннара» куонкуру тэрийэр. Куонкуруска Саха сирин 18-45 саастаах олохтоохторо кыттыахтарын сөп. Кыттааччылары үс бөлөххө арахсаллар: «А» бөлөх — 18-22 саастаахтар, «В» бөлөх — 23-35 саастаахтар, «С» бөлөх — 36-45 саастаахтар. Куонкуруска былырыыҥҥы «Миниистир» оонньуу кыайыылаахтара кыттыбаттар.
Куонкурус түөрт түһүмэҕинэн ыытыллыаҕа. Бастакы түһүмэх балаҕан ыйын 27 күнүгэр саҕаламмыта. Билигин алтынньы 26 күнүгэр диэри регистрация, сайаапкалары хомуйуу буола турар. Иккискэ кыттааччылар тургутук толоруохтара. Манна кыттааччылар лиидэрдии хаачыстыбаларын, чинчийэр дьоҕурдарын, олоххо сыаннастарын уонна уопсай билиилэрин тургутан көрүөхтэрэ: уопсастыбаны, быраабы, экэниэмикэни, айылҕаны, тиэхиньикэни, култуураны, ускуустубаны төһө билэллэрин бэрэбиэркэлиэхтэрэ. Итиэннэ бу түһүмэххэ бэйэни билиһиннэрэр хабааннаах 30-90 сөкүүндэлээх видео-презентация ирдэнэр.
Иккис түһүмэх кэнниттэн 300 бастыҥ кыттааччы салгыы күрэхтэһэр кыахтаныаҕа. Салгыы финалга уон кыттааччыттан турар хамаанданы кыайыылааҕынан быһаарыахтара. Кинилэр Ил Дархан гранын ылан, дойду бастыҥ үрдүк үөрэҕин кыһаларыгар үөрэнэр быраабы ылыахтара. Итиэннэ кыайыылаахтар өрөспүүбүлүкэ каадырдарын резервэтигэр киириэхтэрэ.
«Саха сирин талааннара» куонкуруска кыттыан баҕалаахтар сайаапканы бу ссылканан ыытыҥ: https://komanda.sakha.gov.ru/ru-RU/ya-talant
Инстаграм: instagram.com/ya_talant
Билсэр нүөмэрдэргит: +7 (4112) 50-71-24, +7 (924) 560-44-27
edersaas.ru