«Саха сирин талааннара» куонкуруска сайаапканы тутуу түмүктэнэн эрэр
«Саха сирин талааннара» каадырдары быһаарар куонкуруска сайаапканы тутуу аҕыйах күнүнэн түмүктэниэҕэ. Бу уонна аныгыс түһүмэхтэр туһунан тэрийээччилэр социальнай ситимтэн быһа эпииргэ тахсан кэпсээтилэр.
«Саха сирин талааннара» куонкурус «Миниистир» дьыалабыай оонньуу саҥардыллыбыт түһүмэҕэ буолар. Тэрийээччилэр иһитиннэрбиттэринэн, кыттыан баҕалаахтартан сайаапканы алтынньы 26 күнүгэр диэри туталлар. Ол кэнниттэн ахсынньыга диэри сүүмэрдиир түһүмэх ыытыллыаҕа. Маныаха кыттааччылары уопсай билиигэ тургутуу күүтэр. Уопсастыбаны, быраабы, экэниэмикэни, айылҕаны, тиэхиньикэни, култуураны, ускуустубаны төһө билэллэрин бэрэбиэркэлиэхтэрэ. Тургутууну кыттааччы 35 мүнүүтэ иһигэр толоруохтаах.
Оттон үһүс түһүмэххэ бэйэни билиһиннэрэр хабааннаах 90 сөкүүндэлээх видео-презентация ирдэнэр.
Бу кэнниттэн хаалбыт 300 бастыҥ кыттааччы салгыы күрэхтэһэр кыахтаныаҕа. Ахсынньыга кинилэр лиидэрдии хаачыстыбаларын, чинчийэр дьоҕурдарын, олоххо сыаннастарын көрдөрүөхтэрэ.
«Биһиги сайдыан, билиэн-көрүөн баҕарар дьоҥҥо көмөлөһүөхпүтүн баҕарабыт. Түмүккэ уон чаҕылхай кыттааччы дойдубут уонна тас дойдулар бастыҥ үөрэхтэрин кыһаларыгар үөрэнэр кыахтаныахтара. Оттон финалга ааспыт 300 киһи ахсынньыга олус туһалаах, киһини эргиччи сайыннарар бырагырааманан үөрэниэхтэрэ», — диэн Ыччат дьыалаларыгар уонна социальнай коммуникацияҕа министиэристибэ сүрүн исписэлииһэ Николай Иванов иһитиннэрэр.
«Саха сирин талааннара» куонкурус кыайыылаахтара өрөспүүбүлүкэ каадырдарын резервэтигэр киириэхтэрэ.
Кыттыан баҕалаахтар сайаапканы бу ссылканан ыытыҥ: https://komanda.sakha.gov.ru/ru-RU/ya-talant
Инстаграм: instagram.com/ya_talant
Билсэр нүөмэрдэргит: +7 (4112) 50-71-24, +7 (924) 560-44-27
edersaas.ru