Балаҕан ыйын 10-14 күннэригэр Сербия Белградыгар көҥүл тустууга аан дойду чөмпүйэнээтэ буолуоҕа. Манна Польша, Румыния, Македония, Австралия аатыттан күрэхтэһэр тустууктарбыт кыттыахтара.
Саха сирин тустууга оскуолатын түөрт иитиллээччитэ — 57 киилэҕэ Македонияттан Владимир Егоров, Австралияттан Георгий Окороков, 61 киилэҕэ Польшаттан Эдуард Григорьев, Румынияттан Николай Охлопков күрэхтэһиэхтэрэ. Сүүмэрдэммит хамаандалар сайаапкалара Тустуу норуоттар икки ардыларынааҕы федерациятын саайтыгар таҕыста диэн «Спорт Якутии» иһитиннэрэр.
Сааҥсыйаларынан сибээстээн аан дойду чөмпүйэнээтигэр Арассыыйа уонна Белоруссия хамаандалара кыттыбаттар. Онон, Белоруссияҕа легионердаабыт Ариян Тютрин, Андрей Бекренев уонна Ньургун Скрябин күрэхтэһиигэ кыттыбаттар.