Саха сирин Суруйааччыларын сойууһа – Арассыыйаҕа бастыҥ!

Бөлөххө киир:

Ахсынньы 4 күнүгэр Москваҕа, Литератордар Киин дьиэлэригэр пленум уонна Арассыыйа Суруйааччыларын сойууһун 60 сылыгар аналлаах үөрүүлээх мунньах буолла.

Бу уопсастыбаннай холбоһук устуоруйата ССРС Суруйааччыларын сойууһун регионнааҕы салаатын – РСФСР Суруйааччыларын сойууһун быһыытынан тэриллиэҕиттэн саҕаланар. Бастакы бэрэссэдээтэлинэн суруйааччы Леонид Соболев, аатырбыт-сураҕырбыт «Морская душа» кинигэ ааптара, талыллыбыта.

Бүгүн Николай Иванов салайааччылаах Арассыыйа Суруйааччыларын сойууһа бэйэтин кэккэтигэр 8 тыһыынчаттан тахса айар куттаах дьону түмэр бөдөҥ, күүстээх холбоһугунан буолар.

Ханнык баҕарар үбүлүөйдээх сылга, үгэс быһыытынан, үлэҕэ түмүктэри таһаараллар, инники былааннары торумнууллар. Ол чэрчитинэн, 2018 сыл түмүктэринэн Арассыыйа Суруйааччыларын сойууһун бастыҥ үлэлээх регионнааҕы холбоһугунан Наталья Харлампьева салайааччылаах Саха сирин Суруйааччыларын сойууһа буолан, кыайыылааҕынан таҕыста уонна Леонид Соболев аатынан Дипломунан наҕараадаланна.

Маны таһынан, суруйааччылар сойуустарын үбүлүөйдээх сылыгар өссө биир үөрүүлээх сонун – Саха сирин Суруйааччыларын сойууһун бырабылыанньатын бэрэссэдээтэлэ,  саха норуодунай бэйиэтэ Наталья Харлампьеваҕа Василий Шукшин мэтээлин туттардылар.

 Татьяна Маркова.

Ыспыраапка

«Василий Шукшин» мэтээл –  Бүтүн Арассыыйатааҕы уопсастыбаннай наҕараада.  Талааннаах суруйааччы, актер, режиссер Василий Шукшин айар нэһилиэстибэтин чинчийиигэ, тарҕатыыга уонна Арассыыйа элбэх омук тылынан литературатыгар, култууратыгар, искусствотыгар итиэннэ нуучча тылын араҥаччылааһыҥҥа-харыстааһыҥҥа бөдөҥ кылааттаах Арассыыйа олохтоохторугар туттарыллар.

+1
0
+1
0
+1
0
+1
0
+1
0
+1
0
+1
0