Саха сирин судаарыстыба уонна наука бөдөҥ диэйэтэлин Айаал Степановы кэриэстээн, кинигэ сүрэхтэниитэ буолла

Ааптар: 
Бөлөххө киир:

Бэҕэһээ Дьокуускайга бөдөҥ судаарыстыбаннай, научнай уонна уопсастыбаннай диэйэтэл, наука уонна тиэхиньикэ эйгэтигэр СӨ Судаарыстыбаннай бириэмийэтин лауреата, Арассыыйа уонна өрөспүүбүлүкэ агробырамыысыланнай комплексын бочуоттаах үлэһитэ, СӨ норуотун хаһаайыстыбатын үтүөлээх үлэһитэ, тыа хаһаайыстыбатын наукатын дуоктара, Аграрнай үөрэхтээһин норуоттар икки ардыларынааҕы академиятын чилиэнэ, Естественнэй наукалар Арассыыйатааҕы академияларын академига Айаал Иванович Степанов сырдык аатыгар сүгүрүйэн, икки туомнаах кинигэ сүрэхтэниитэ буолла.

Кинигэ сүрэхтэниитигэр өрөспүүбүлүкэ салалтатыттан Саха сирин Бырабыыталыстыбатын Бэрэссэдээтэлин солбуйааччы Михаил Никифоров кытынна. Вице-премьер Айаал Иванович төрөппүттэригэр саха норуотун чулуу уолун иитэн таһаарбыттарын иһин махтанна.

“Айаал Иванович тыа хаһаайыстыбатын уонна аграрнай наука сайдыытыгар кылгас кэмҥэ чаҕылхай кылаатын киллэрбитэ. Мин кинини чугастык билэбин. Айаал Иванович олус судургу майгылаах, киэҥ билиилээх, талааннаах салайааччы уонна учуонай этэ. Бүгүн кини сырдык аатыгар анаммыт кинигэ күн сирин көрдө. Кинигэни бэчээккэ бэлэмнээбиттэргэ махтанабын”, — диэтэ Михаил Никифоров.

Кинигэ “Айаал Иванович Степанов. Воспоминания” бастакы туомугар бииргэ төрөөбүттэрин, чугас дьонун, аймахтарын уонна доҕотторун ахтыылара киирдилэр. “Айаал Иванович Степанов. Доклады, выступления, публикации” кинигэ иккис туомугар А.И.Степанов өрөспүүбүлүкэ, Арассыыйа, норуоттар икки ардыларынааҕы таһымнаах сүбэ мунньахтарга АПК сайдыытын, айылҕа харыстабылын, экология, аграрнай наука уонна д.а. проблемаларга анаммыт дакылааттара, тыл этиилэрэ, таһааттарбыт матырыйааллара киирдилэр.    Кинигэ сүрэхтэниитигэр сүрүн дакылааты тыа хаһаайыстыбатын миниистирэ Александр Атласов оҥордо. Кини Айаал Степанов тыа хаһаайыстыбатын миниистиринэн үлэлиир кэмигэр 2002-2006 сылларга өрөспүүбүлүкэ тыатын сирин социальнай-экэнэмиичэскэй сайдыытын Бэрэсидьиэн бырагырааматын олоххо киллэриигэ күүскэ үлэлээбитин аҕынна. Ол курдук, кини өрөспүүбүлүкэ тус сыаллаах бырагыраамаларыгар тыа сирин сайдыытыгар үбү туспа строканан көрөргө этии киллэрбит. Маннык быһаарыныыны ылыныы өрөспүбүлүкэ хас биирдии табаары оҥорооччутун өйүүргэ төһүү буолбут. А.И.Степанов салалтатынан үүнээйи сиэмэтин ылыы тиһигэ, сылгыны иитиигэ племенной үлэ тиһигэ тупсарыллыбыта, саха ынаҕын генофондатын племенной судаарыстыба питомнига тэриллибитэ, саҥа вакциналар, пробиотиктар оҥоһуллан тахсыбыттара.

Айаал Степанов СӨ Бэрэсидьиэнин уонна Бырабыыталыстыбатын Дьаһалтатын салайааччытын солбуйааччынан, РТХНА Сибиирдээҕи салаатын Саха сиринээҕи ТХНЧИ дириэктэринэн, тыа хаһаайыстыбатын миниистиринэн, СӨ Бырабыыталыстыбатын Бэрэссэдээтэлин солбуйааччынан үлэлээбитэ. Бу Орто дойдуттан туоруон иннинэ М.Г.Сафронов аатынан Саха сиринээҕи ТХНЧИ дириэктэрэ этэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Андрей Сорокин түһэриитэ

Бэлэмнээтэ Женни Стрюкова

+1
0
+1
0
+1
0
+1
0
+1
0
+1
0
+1
0