Санкт Петербург куоракка травматолог-ортопедтар Бүтүн Арассыыйатааҕы ХI cийиэстэрэ ыытылынна. Уочараттаах сийиэскэ Арассыыйаттан, Соҕуруулуу-Илиҥҥи уонна Киин Азия, Европа дойдуларыттан түөрт тыһыынчаттан тахса дэлэгээт кытынна.
edersaas.ru
Сийиэскэ Саха Өрөспүүбүлүкэтиттэн Степан Тордуин, Анатолий Комиссаров, Потап Потапов, Виктор Веревкин, Сергей Софронов, Геннадий Пальшин, Рева Алексеев уонна Виктор Епанов курдук, Саха сирин бастыҥ травматолог-ортопедтара кытыннылар.
Кинилэртэн биирдэстэрэ, Өрөспүүбүлүкэтээҕи 2 №-дээх балыыһа ортопедияҕа отделениетын сэбиэдиссэйэ Анатолий Комиссаров иһитиннэрбитинэн, сийиэскэ травматология уонна ортопедия бары кэриэтэ хайысхаларын сиһилии ырыттылар.
«Мин хас да секцияҕа сырыттым. Эндопротезированиеҕа, килиэккэ технологияларыгар, остеопорозка дойду сүрүннүүр ортопедтарын иһитиннэриилэриттэн улаханнык астынным. Хомойуох иһин, эндопротез үйэтэ уһуна суох, 5-20 сылга туһалыыр. Биһиги ыарыһахтарга протез туруорар буолбуппут 12 сыл буолла. Ол аата кинилэр ревизионнай эндопротезированиеҕа номнуо кэлиэхтээхтэр. Онон, ыарыһахтарбыт протезтарын бэйэлэрин өрөспүүбүлүкэлэригэр уларыталларын туһугар квота ахсаанын элбэтиэххэ наада.
Сийиэскэ этиллибит биир интэриэһинэй боппуруоһунан инфицированнай эндопротезирование буолла. Уон сыл анараа өттүнээҕи кэми кытары тэҥнээтэххэ, ортопедия уонна травматология иннин диэки айаннаата. Биһиги протезтарынан, имплантаннарынан хааччыллыылаахпыт. Сотору компьютернай навигацияны атыылаһыахпыт диэн эрэллээхпин, – диэн кэпсээтэ.
Саха сирин ортопедтара сийиэскэ атын регионнар исписэлиистэрин санааларын истэн баран, Өрөспүүбүлүкэтээҕи 2 №-дээх балыыһаҕа үлэ сөптөөхтүк ыытылларын, дойдуга оҥоһуллар эпэрээссийэлэри номнуо ситиһиилээхтик оҥороллорун итэҕэйдилэр.
Надежда ЕГОРОВА, «Саха сирэ» хаһыат, edersaas.ru