2023 сылга бары муниципальнай оройуоннар уонна үөрэх тэрилтэлэрэ кыттыылаах өрөспүүбүлүкэ үөрэнээччилэрин комплекснай Спартакиадалара ыытыллыаҕа. Спартакиада финала Дьокуускайга буолуоҕа.
Санатан суруйдахха, 2021 сыллаахха Арассыыйаҕа 2030 сылга диэри оҕо успуордун сайыннарыы Концепцията уонна ол олоххо киириитин тэрээһиннэрин былаана ылыныллыбыта.
Өрөспүүбүлүкэ Ил Дархана Айсен Николаев бырабыыталыстыбаҕа эрэгийиэннээҕи бырагырааманы толкуйдуурга уонна олоххо киллэрэргэ соруйбута.
Эрэгийиэннээҕи бырагыраамаҕа оскуолаларга физкултуура уруогун чааһын элбэтэр, спортивнай кулууптары тэрийэр, маассабай бырагыраамалары (ГТО) популяризациялааһын, үөрэнээччилэр Спартакидаларын сөргүтүү туһунан бастакы уочарат суруллубута. Маннык күрэхтэһии Саха сиригэр бүтэһигин 2017 сыллаахха ыытыллыбыта.
Вице-премьер Сергей Местников этэринэн, бу бырагыраама олоххо киириитэ үүнэр көлүөнэ чөл олохтоох, этэ-сиинэ сайдыылаах, успуордунан утумнаахтык дьарыктанар буоларыгар көмө буолуоҕа.
2024 сылга өрөспүүбүлүкэ оҕолорун 80 %-а успуордунан уонна физическэй култууранан дьарыктанар буолуохтаах диэн сыал турар.
Ил Дархан уонна Бырабыыталыстыба дьаһалтатын пресс-сулууспата.
Хаартыска: Sportyakutia.ru архыыбыттан.