Маны аах Үөрэх уонна наука

Саха сирин үрдүк үөрэҕин кыһаларыгар бүддьүөт миэстэтин эптилэр

Быйыл Саха сирин үрдүк үөрэҕин кыһаларыгар 6 115 бүддьүөт миэстэтэ көрүлүннэ, бу ааспыт сылы кытта тэҥнээтэххэ тыһыынча кэриҥэ миэстэнэн элбэх. Быйыл оскуоланы бүтэрэр 7900 оҕо 77 % өрөспүүбүлүкэ иһинээҕи үрдүк үөрэх бүддьүөккэ миэстэтигэр киирэр кыахтаах.

edersaas.ru

“Чопчу салаалары сайыннарарга өрөспүүбүлүкэҕэ бэйэтин квалифицированнай каадырдара ирдэнэллэр.  Маныаха үөрэнээччилэр идэлэрин талар түһүмэхтэригэр көмөлөһөр, ханнык эйгэҕэ ордук ирдэниэхтэрин уонна өрөспүүбүлүкэ экэниэмикэтин чопчу бырайыактарынан, салааларынан бэлэмниир наада. Биһиги сорукпут – үрдүк, орто үөрэх тэрилтэлэригэр саҥа идэлэри аһыы уонна салааларынан ханнык идэлэр ирдэнэллэрин учуоттаан сөп буолар миэстэни арыйыы”, — диэн бырабыыталыстыба бэрэссэдээтэлэ Андрей Тарасенко үөрэх тэрилтэлэрин бэрэстэбиитэллэрэ кыттыылаах түмүктүүр мунньахха бэлиэтээтэ.

СӨ үөрэҕин уонна билимин миниистирэ Ирина Любимова иһитиннэрбитинэн, гуманитарнай уонна мэдиссиинэ исписээлинэстэригэр туттарсааччы ахсаана эбиллэн иһэр. Бу тустаах хайысхаҕа бүддьүөт миэстэтэ (КЦП) эбиллиитин кытта сибээстээх.

Быйыл өрөспүүбүлүкэ орто үөрэҕин кыһаларыгар саҥа исписээлинэстэри аһан эрэллэр, олор ортолоругар “химическэй холбоһуктар аналитическай хонтуруолларын технологията” буолар. Бу үөрэх дьылыгар орто үөрэххэ, уопсайа, 6700-тэн тахса бүддьүөт миэстэтин көрбүттэр.

Үөрэххэ туттарсыыга докумуону тутуу бэс ыйын 20 күнүттэн саҕаланар. Абитуриеннар дойду иһинээҕи бары судаарыстыбаннай үрдүк үөрэх тэрилтэлэригэр уонна филиалларыгар докумуоннарын тэйиччиттэн (дистанционно) ыытыахтарын уонна түһүмэхтэринэн онлайн кэтээн көрүөхтэрин сөп. Докумуону  судаарыстыбаннай өҥө порталыгар «Поступление в вуз онлайн» суперсервис нөҥүө ыытыахха сөп. Эрдэ сервис бүддьүөт миэстэтигэр туттарсааччыларга эрэ туһаныллыбыт эбит буоллаҕына, быйылгыттан төлөбүрдээххэ (внебюджет), ону тэҥэ, тус сыаллаах (целевой) уонна чэпчэтиилээх (льготнай) миэстэлэргэ туттарсааччыларга анаан эмиэ үлэлиэҕэ.

Абитуриеннарга көмөлөһөр өрөспүүбүлүкэтээҕи “суһал линия” ыстааба үлэтин саҕалыыр, үөрэххэ туттарсыыга сыһыаннаах ыйытыыларгытыгар хоруйу 8 (4112) 50-60-44 төлөпүөн нүөмэринэн ылыаххытын сөп.

Санатан эттэххэ, өрөспүүбүлүкэҕэ 6 үрдүк үөрэх уонна 42 орто үөрэх тэрилтэтэ баар.

 

СӨ Ил Дарханын уонна СӨ Бырабыыталыстыбатын пресс-сулууспата.

 

1
0
Telegram @edersaas20