СӨ Уу ресурсаларын судаарыстыбаннай управлениета тэриллибитэ 50 сылыгар анаан «Величие и красота рек Якутии» диэн фотоальбом бэчээттэнэн таҕыста.
edersaas.ru
Фотоальбом-кинигэ ааптара — уу хаһаайыстыбатын бочуоттаах үлэһитэ, уу хаһаайыстыбатын туйгуна, Нуучча географическай уопсастыбатын чилиэнэ, хаартыскаҕа түһэрээччи Иннокентий Андросов.
Иннокентий Михайлович өр кэмҥэ уу хаһаайыстыбатын салаатыгар үлэлээбит буолан, ханна да сырыттар, Саха сирин өрүстэрин, күөллэрин ураты көстүүлэрин таба көрөн, хаартыскаҕа түһэрэн үйэтитэр үгэстээх. Оскуолаҕа үөрэнэр сылларыттан хаартыскаҕа түһэриинэн үлүһүйэн дьарыктаммыта. Бастакы фотоаппараата «Чайка-2м» этэ. Бу кэмтэн ыла фотоаппараатын ханна да бардар, өрүү илдьэ сылдьар. Иннокентий Андросов Арассыыйатааҕы, өрөспүүбүлүкэтээҕи таһымнаах хаартыскаҕа түһэрээччилэр куонкурустарын лауреата, дипломана.
Саҥа тахсыбыт фотоальбомҥа Саха сирин 41 өрүһүн хаартыскалара түмүллэн киирдилэр. Маны таһынан Өлүөнэ, Дьааҥы, Индигир, Өлөөн, Халыма өрүстэрин туһунан кылгас иһитиннэриилэр бэчээттэннилэр.
Ыспыраапка
И.М. Андросов Таатта улууһуттан төрүттээх. 1981 сыллаахха Саха судаарыстыбаннай университетын бүтэрбитэ. «Географ-преподаватель» идэлээх. Салгыы 1991 сыллаахха Омскайдааҕы тыа хаһаайыстыбатын институтун бүтэрэн, «инженер-гидротехник» идэтин баһылаабыта.
1981-1988 сс. Саха АССР мелиорациятын уонна уу хаһаайыстыбатын министиэристибэтигэр инженеринэн үлэлээбитэ.
1988-1989 сс. «Якутводмелиорация» тэрилтэҕэ ΙΙ-с категориялаах инженер.
1989-1993 сс. Амматааҕы производственнай тутуу, эксплуатациялааһын холбоһугун салайааччыта.
1993-1997 сс. «Якутводмелиорация» холбоһук салаатын начаалынньыга, генеральнай дириэктэри солбуйааччы
1997 – 1999 сс. «Сельхозводмелиорация» холбоһук салаатын начаалынньыга, генеральнай дириэктэри солбуйааччы.
1999-2001 сс. «Рейтинг-Плюс» ХЭУо дириэктэрэ.
2001 — 2010 сс. Уу ресурсаларын федеральнай агентствотын Өлүөнэ сүнньүнээҕи ууга управлениетын салайааччытын солбуйааччы.
2010-2013 сс. – Уу ресурсаларын федеральнай агентствотын Өлүөнэ сүнньүнээҕи ууга управлениетын салайааччытын эбээһинэһин толорооччу.
2013-2019 сс. – Уу ресурсаларын федеральнай агентствотын Өлүөнэ сүнньүнээҕи ууга управлениетын салайааччыта.
2019 сылтан Нэһилиэнньэҕэ куттал суох буолуутун хааччыйар судаарыстыбаннай кэмитиэт бастакы солбуйааччыта.
Биһ. корр., edersaas.ru