Саха сирин панкратионистара Уһук Илин чөмпүйэнээтиттэн тоҕус мэтээллээх кэллилэр
Забайкалье кыраайыгар Читаҕа панкратиоҥҥа Уһук Илин күрэхтэһиитэ уонна чөмпүйэнээтэ ыытылынна. Күрэхтэһиигэ Уһук Илин түөрт эрэгийиэниттэн 180 спортсмен кыттыыны ылла: Забайкалье кыраайа, Амур уобалаһа, Саха уонна Бурятия Өрөспүүбүлүкэлэрэ.
edersaas.ru
Саха сирин чиэһин 12 спортсмен көмүскээбититтэн, тоҕус уол мэтээлгэ тигистэ. Саха уолаттара дойдуларыгар үс кыһыл көмүс, биир үрүҥ көмүс уонна биэс боруонса мэтээллээх төннөн эрэллэр. Маны таһынан, хамаанданан түмүккэ Саха сирэ иккис миэстэ буолла.
Панкратион Өрөспүүбүлүкэтээҕи федерациятын президенэ Дмитрий Федоров уолаттар бары да күүстээх санааларын, кыайыыга дьулуурдарын көрдөрдүлэр диэн эттэ:
—Кыайыылаахтар уонна призердар Санкт-Петербурга муус устарга ыытыллыахтаах күрэхтэһиигэ уонна Севастопольга дойду чөмпүйэнээтигэр кыттар быраабы ыллылар. Ордук Дьааҥы улууһуттан төрүттээх, АГАТУ устудьуонун Егор Рожины бэлиэтээн этиэхпин баҕарабын. Егор былырыын юниордарга Уһук Илин боруонса призера буолбута уонна «Бастыҥ бөҕөс» анал ааты ылбыта. Быйыл номнуо улахан дьоҥҥо кыһыл көмүс мэтээли ылары ситистэ. Финалга кини Бурятия күүстээх утарсааччытын нокаутка ыыппыта. Егор тренера – энтузиаст Вячеслав Васильев.
Ону таһынан, Айхал бөһүөлэгиттэн сылдьар Гаджи Лабазановы бэлиэтээн этиэхпин баҕарабын. Бөҕөс наар бастакы нүөмэринэн үлэлээн, юниордарга кыайыылаах аатын сүктэ.
Төһө да биһиги уолаттарбыт дьарыктанар усулуобуйалара суох буоллар, ситиһиилэринэн биһиэхэ панкратион сайдан иһэрин дакаастыыллар, — диэн федерация президенэ эттэ.
Sportyakutia.ru