Саха АССР 100 сыла

Саха сирин олохтоохторун үбүлүөйүнэн ДНР баһылыга Денис Пушилин эҕэрдэлээтэ

Аҕыйах хонуктааҕыта Саха Өрөспүүбүлүкэтин Ил Дарханын Айсен Николаев сорудаҕын толорон,  Саха сирин дэлэгээссийэтэ Донецкай Норуодунай Өрөспүүбүлүкэттэн эргиллибитэ. Кинилэр манна бииргэ үлэлээһини олохтуу уонна Донбасс олохтоохторугар гуманитарнай көмөнү илдьэ сылдьыбыттара. Бүгүн ДНР баһылыга Денис Пушилин Саха сирин олохтоохторун үбүлүөйдээх бэлиэ күнүнэн эҕэрдэлээтэ.

“Өлүөнэ кыраайын олохтоохторун дьылҕата элбэх омуктаах Арассыыйаны  кытта бигэ ситимнээх. Бэйэҕит төрүт олоххутун-дьаһаххытын, үгэскитин уонна култуураҕытын илдьэ сылдьан, эһиги Арассыыйа устуоруйатын байытаҕыт уонна кини быстыспат сорҕотунан буолаҕыт. Саха Өрөспүүбүлүкэтэ сайдыы суолунан бигэтик, эрэллээхтик иһэр, Саха сирин олохтоохторо – үлэһит, тулуурдаах дьон, төрөөбүт дойдуларын таптыыллар, өбүгэлэрин умнубаттар. Төһө да бэйэ-бэйэбитин кытта тэйиччи олордорбут Донецкай Норуодунай Өрөспүүбүлүкэ олохтоохторугар бу өйдөбүллэр эмиэ чугастар. Ону тэҥэ устуоруйабыт уопсай страницалардаах, Саха сирин уонна Донбасс уолаттара Ийэ дойдуларын ньиэмэс фашистарыттан көмүскээн, бэйэлэрин кэрэйбэккэ Улуу Кыайыыны уһансыбыттара. Оҕолорбут инники кэскиллэрин туһугар биһиги доҕордуу быһыыбытын харыстыахтаахпыт, бииргэ үлэлиэхтээхпитт, хардарыта сыһыаны олохтуохтаахпыт”, — диэтэ ДНР баһылыга.

Кини Донбасс норуота билигин ыарахан кэмнэри ааһарын бэлиэтээтэ уонна бары ыарахаттары туоруохпут диэн эрэнэрин биллэрдэ.   “Босхолуур дьайыы кыайыынан түмүктэммитин кэннэ Донецкай Норуодунай Өрөспүүбүлүкэ экэниэмикэтэ чөлүгэр түһүөҕэ.  Биһиги араас хайысхаларга сибээстэри кэҥэтиэхпит. Биһиэхэ тумус тутуллар эйгэлэр – металлургия, массыынаны оҥоруу, хайаны байытар уонна химия салаата, астыыр-үөллүүр уонна ас-үөл бырамыысыланнаһа, тыа хаһаайыстыбата. Донецкай Норуодунай Өрөспүүбүлүкэ уонна Саха Өрөспүүбүлүкэтин икки ардыларыгар бииргэ үлэлээһин хардарыта барыстаах уонна көдьүүстээх буолуоҕа диэн эрэнэбин”, — диэтэ Денис Пушилин.

Кини Саха сирин олохтоохторугар Донбасска гуманитарнай көмөлөрүн иһин махтанна уонна олох-дьаһах оннун  буллаҕына, чугастааҕы кэмҥэ Донецкай Норуодунай Өрөспүүбүлүкэ дэлэгээссийэтэ бырааттыы Саха сиригэр ыалдьыттыаҕа диэн эрэнэрин биллэрдэ.

Санаттахха, 2022 сыл муус устар 20 күнүгэр Саха сирин дэлэгээссийэтэ Донецкайга сырыытын кэмигэр Саха Өрөспүүбүлүкэтэ уонна Донецкай Норуодунай Өрөспүүбүлүкэ коммюникеҕа илии баттаспыттара. РФ Бэрэсидьиэнин иһинэн Саха сирин бастайааннай бэрэстэбиитэлэ Андрей Федотов уонна ДНР бырабыыталыстыбатын бэрэссэдээтэлин э.т. Татьяна Переверзева илии баттаабыттара.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Бэлэмнээтэ Женни Стрюкова

Хаартыска: тустаах саайтан

 

 

1
0
Telegram @edersaas20