Социальнай ситими туһанааччылар быһа сибээс кэмигэр үлэ саҥа киниискэтэ ирдэнэрин туһунан туоһуласпыттара диэн, СӨ Үлэҕэ министиэристибэтэ иһитиннэрэр.
Сыл устата олохтоохтор үлэ киниискэтин электроннай уонна “кумааҕы” барыйааннарын талан оҥотторуохтаахтар. Кумааҕы барыйаанын талбыт дьоҥҥо, үлэ биэрээччи электроннай киниискэ барыйаанын эмиэ толоруоҕа.
Учуот саҥа систиэмэтэ киирэн, дьон докумуона сүппэт буолуоҕа, оччотугар ыстаас туһунан сибидиэнньэ эмиэ диэн ыйаллар. Үлэһит ордук хос кумааҕыттан босхолонор, онтон үлэ биэрээччи – кумааҕы үлэтиттэн. Ону таһынан, үлэ ыстааһын туһунан ирдиир тэрилтэлэр сибидиэнньэни бэйэлэрэ ылар кыахтаахтар. Хас биирдии киһи үлэтин ыстааһын туһунан сибидиэнньэни РФ Пенсионнай фондатын саайтыгар “тус кэбиниэтигэр” (личный кабинет) эбэтэр Судаарыстыбаннай уонна муниципальнай өҥө кэлим порталыгар киирэн көрүөн сөп. Үлэ электроннай киниискэтигэр суруллубут чахчылары билиҥҥи үлэ биэрээччититтэн эбэтэр урут үлэлээбит сириттэн, ону тэҥэ, РФ Пенсионнай фондатыттан эбэтэр МФЦ-тан, тус кэбиниэтиттэн кумааҕыга түһэттэрэн ылыан сөп. Судургу буоларын курдук төлөпүөн анал сыһыарыыларын оҥорбуттар. Балары смартфоҥҥа эбэтэр планшекка хачайдыахха сөп.
Бэлиэтээн эттэххэ, билигин үлэ биэрээччилэр үлэ туһунан сибидиэнньэ электроннайынан оҥоһулларын уонна үлэ киниискэтин талар кыах бэриллэрин туһунан иһитиннэрэллэр.
Өскөтүн бу иннинэ үлэһиттэргэ иһитиннэриини бэс ыйын 20 күнүгэр диэри диэбит эбит буоллахтарына, билигин 2020 сыл алтынньы 31 күнүгэр диэри болдьоҕо уһаан биэрдэ. Маныаха үлэһиттэр электроннай дуу, кумааҕы дуу барыйааны талалларын туһунан сайабылыанньаларын 2020 сыл ахсынньы 31 күнүгэр диэри биэриэхтэрин сөп.
2021 сыл тохсунньу 1 күнүттэн үлэҕэ аан маҥнай киирэр дьоҥҥо электроннай эрэ киниискэ арыллыаҕа, кумааҕынан барыйаан толоруллубат.
СӨ Ил Дарханын уонна Бырабыыталыстыбатын саайтыттан.