Маны аах Экэниэмикэ

Саха сирин олохтоохторо социальнай каартаны бары оройуоннарга ылыахтара

“Саха сирин олохтооҕун каартатынан” бары социальнай төлөбүрдэри, биэнсийэни ылыахха сөп. Маны сэргэ бу каарта тырааныспар уонна баан каартатын курдук үлэлиир, үгүс социальнай, успуорт, култуура эбийиэктэрэ холбоммуттара. Бүгүн Саха сирин олохтооҕун социальнай каартатын 16 оройуоҥҥа 14 тыһыынчаттан тахса киһи ылла.

Бу биир кэлим сыыппара сервиһэ кумааҕы докумуоннартан аккаастанарга көмөлөһөр, ону тэҥэ култуура уонна успуорт тэрилтэлэригэр, маҕаһыыннарга, аптекаларга чэпчэтиилэринэн уонна бонустарынан туһаныахха, уопсастыбаннай тырааныспарка айан төлөбүрүн төлүөххэ, авиабилиэт да атыылаһыахха сөп. Бүгүн бу сервис өрөспүүбүлүкэ үрдүнэн 800 тахса партнердаах.

Үлэ министиэристибэтэ этэринэн, каарта киһи дастабырыанньатын, социальнай чэпчэтиинэн туһанааччы дастабырыанньатын солбуйуоҕа, ону тэҥэ каарталаахтар элбэх оҕолоох дьиэ кэргэн ыспыраапкатын көрдөрүмүөхтэрин син.

Саха сирин олохтооҕун каартата – босхо хааччыйар баан каартата уонна хантаага суох төлүүр технологиялаах. Чэпчэтиинэн туһанар дьон верификацияны ааһаллара ирдэммэт, бары чахчылары эрэгийиэн Үлэҕэ министиэристибэтэ боломуочуйалаах “Алмазэргиэнбааҥҥа” бэйэтэ биэрэр.

Санаттахха, былырыыҥҥы сыл бүтүүтэ Саха сирин премьера Андрей Тарасенко сорудаҕынан өрөспүүбүлүкэ олохтоохторугар биир кэлим сервис кэнсиэпсийэтэ торумнаммыта. 2021 сыл от ыйын 1 күнүттэн пилотнай эрэсииминэн каарталары Дьокуускай, Нерюнгри, Ньурба, Мииринэй куораттарга уонна Бэрдьигэстээххэ киллэрбиттэрэ. Алтынньы ыйтан бырайыак бары оройуоннарга үлэлиир.

Бу каартаны онлайн толотторуохха сөп – портал нөҥүө сайабылыанньа биэрэн, ону тэҥэ МФЦ эбэтэр Алмазэргиэнбаан офистарыгар.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Бэлэмнээтэ Женни Стрюкова

Хаартыска: тустаах саайтан

0
0
Telegram Whatsapp