Үөрэҕи уонна науканы кэтээн көрөр федеральнай сулууспа бэйэтин саайтыгар суруйарынан, быйыл күһүн Арассыыйа 14 эрэгийиэнин 1400 оскуолатын үөрэнээччилэрэ PISA ыстандаартынан үөрэх хаачыстыбатын чинчийиитигэр кыттыахтара. Манна суруллубут 14 эрэгийиэн кэккэтигэр Саха сирэ эмиэ киирсэр.
Дойду бэрэсидьиэнэ Владимир Путин Арассыыйа 2024 сылга уопсай үөрэхтээһин хаачыстыбатынан 10 бастыҥ дойду кэккэтигэр киириэхтээх диэн сорук туруорбута. Маны хайдах быһааралларый? Аан дойду үрдүнэн араас чинчийиилэр, сыанабыллар, кэтээн көрүүлэр оҥоһуллаллар. Уопсай үөрэхтээһин хаачыстыбатын быһаарарга PISA, PIRLS уонна TIMSS норуоттар икки ардыларынааҕы чинчийиилэр түмүктэригэр олоҕуруохтара дииллэр. Холобур, быйыл күһүн буолар PISA чинчийиитигэр Саха сирин сэргэ Бурятия, Кабардино-Балкария өрөспүүбүлүкэлэрэ, Ставропольскай, Краснодарскай кыраайдар, Ямало-Ненецкэй автономнай уокурук, Саратовскай, Ульяновскай, Вологодскай, Иркутскай, Томскай, Ивановскай, Липецкэй уонна Брянскай уобаластар кыттыахтара.
Судургутук быһаардахха, PISA — үөрэх ситиһиитин сыаналыыр норуоттар икки ардыларынааҕы бырагыраама буолар. Үс сылга биирдэ 15 саастаах үөрэнээччилэр ортолоругар ыытыллар. Маныаха оҕо математикаҕа билиитин, естественнэй-научнай кырааматынаһын итиэннэ ааҕыытын бэрэбиэркэлииллэр.
Чинчийии иитинэн оскуола, инфраструктура, салайар идиэйэлэр уонна быраактыкалар тустарынан иһитиннэриилэри хомуйуохтара диэн ыйаллар. Ол түмүгэр, оскуолалар хайдах гынан, тугу туһанан үрдүк көрдөрүүнү ситиспиттэрин быһаарыахтара итиэннэ ол уопуту үөрэх атын кыһаларыгар тарҕатыахтара диэн суруйаллар. Хайа эрэ субъегы дуу, оскуоланы дуу, оҕону эбэтэр учууталы дуу быһаарар сыаллаах буолбатах диэн этиллэр. Быйылгы чинчийии түмүгэ сыл бүтүүтүгэр, кэлэр сыл саҥатыгар номнуо биллиэҕэ дииллэр.
“Саха сирэ” хаһыат, edersaas.ru
Хаартыска: интэриниэттэн