Саха сирин норуоттарын VII Спортивнай оонньуулара 2019 сылга ыытыллыахтара
Саха Өрөспүүбүлүкэтин Ил Дархана Егор Борисов ыам ыйын 16 күнүнээҕи Ыйааҕынан Саха сирин норуоттарын VII Спортивнай оонньуулара 2018 сылтан 2019 сылга көһөрүлүннүлэр.
Бүгүн буолбут пресс-кэмпириэнсийэҕэ спорт миниистирин бастакы солбуйааччы Семен Чердонов суруналыыстарга Амма, Таатта, Чурапчы, Уус Маайа улуустара халаантан улаханнык эмсэҕэлээбиттэринэн, өрөспүүбүлүкэ үрдүнэн федеральнай суолталаах ыксаллаах быһыы-майгы биллэриллибитин санатан туран, Оонньуулар эһиил Аммаҕа от ыйын 3 – 8 күннэригэр ыытыллыахтарын эттэ.
Оонньуулар иккис түһүмэхтэрин иитинэн быйыл ыытыллыбыт Саха сирин уон биир чөмпүйэнээтигэр оонньоммут путевкалар күүстэрин сүтэрбэттэр. Оттон хаалбыт түөрт көрүҥҥэ – чэпчэки атлетикаҕа, оҕунан ытыыга, спортиҥҥа уонна адаптивнай спорт чэпчэки атлетикатын көрүҥнэригэр — сүүмэрдиир күрэхтэһиилэр 2019 сылга көһөрүлүннүлэр.
Роман ПОПОВ, “Саха сирэ” хаһыат, edersaas.ru
+1
+1
+1
+1
+1
+1
+1