Саха сирин норуоттарын спортивнай оонньуулара: хаартыскалар кэпсииллэр

От ыйын 5 күнүгэр  Уус Алдан Бороҕонугар сабыс-саҥа «Майаҕатта Бэрт Хара» стадиоҥҥа Саха сирин норуоттарын VIII спортивнай оонньуулара үөрүүлээх быһыыга-майгыга аһылынна.

Тэрээһин өрө көтөҕүллүүлээхтик ааста. Бастаан биллиилээх шоуменнар Альберт Ноговицын уонна Дмитрий Баишев көрөөччүлэри аралдьыттылар. Уус Алдантан төрүттээх ырыаһыт Бүөккэ Бөтүрүөп биир дойдулаахтарыгар ырыа бэлэхтээтэ.

СӨ Бырабыыталыстыбатын Бэрэссэдээтэлин солбуйааччы Сергей Местников Ил Дархан уонна Уус Алдан олохтоохторун иннигэр тэрээһиҥҥэ бэлэмнэнии  хайдах-туох барбытын, туох оҥоһуллубутун туһунан кылгастык кэпсээтэ. Ол кэнниттэн Ил Дархан Айсен Николаев  Оонньуулар саҕаламмыттарынан мустубут дьону эҕэрдэлээтэ.

Салгыы улуустартан кэлбит  хамаандалар сэлэлээн хааман киирдилэр. Үөрүүлээх аһыллыы кэнниттэн тыйаатыр, циркэ артыыстара, олохтоох дьон уонна оҕолор күүстэринэн  туруоруллубут  уус-уран театральнай шоу буолла.
Саха сирин норуоттарын VIII спортивнай оонньууларын былааҕын  өрө таһаарыы кэнниттэн аһыллыы тэрээһинин чыпчаалынан  — Амматтан  кэлбит уоту стадион сүрүн факелыгар уматыы буолла. Саха сирин норуоттарын VIII спортивнай оонньууларын уотун  Арыйаан Тютрин үөрүүлээх быһыы-майгы ортотугар уматта.   Тэрээһин туһунан  “Саха сирэ” хаһыат бу чэппиэргэ тахсар нүөмэригэр сиһилии ааҕаарыҥ.