Ил Дархан Айсен Николаев иһитиннэрбитинэн, Саха сиригэр 2019 сыллаахха тэриллибит “Хоту” научнай-үөрэтэр киин Арассыыйа куонкуруһугар бастаата.
Бу маннык кииннэр Арассыыйа үрдүнэн икки сыллааҕыта тэриллибиттэрэ. РФ бэрэсидьиэнэ Владимир Путин бэлиэтээбитинэн, научнай-үөрэтэр кииннэр дойдубут бары муннугар тэриллэн, эрэгийиэннэр экономикаларын сайдыытыгар төһүү күүс буолуохтаахтар. Быйылгы куонкуруска барыта 13 сайаапка киирбититтэн Саха сирин киинэ биэс бастыҥнар истэригэр киирсэн, федеральнай граны ылары ситистэ.
Эрэгийиэннэр салайааччылара бырайыактарын научнай-үөрэтэр кииннэр Сэбиэттэрин уопсай мунньаҕар көмүскээбиттэрэ. Мунньаҕы РФ бырабыыталыстыбатын бэрэссэдээтэлин солбуйааччы Дмитрий Чернышенко ыыппыта. Саха сирин бырайыагын Ил Дархан Айсен Николаев бэҕэһээ Мирнэй куораттан көмүскээбитэ.
“Бу научнай-үөрэтэр киин 2019 сыллаахха биэс эрэгийиэн, ол иһигэр Сахалин, Камчатка, Магадан, Чукотка, Саха сирэ, көҕүлээһининэн тэриллибитэ. Бу бырайыак нөҥүө энергетикаҕа, экономика бары хайысхатыгар үрдүкү технологиялары киллэриигэ, ону сэргэ хоту дойду, Арктика айылҕатын харыстааһыҥҥа саҥа тыыны киллэриэхпит этэ. Бырайыакпыт бастыҥнар кэккэлэригэр ааттаммыта бу биһиги барыбыт кыайыыбыт буолар. Бары куолаан ылыстахпытына туруоруммут сыалбытын-сорукпутун ситиһиэхпит”, – диэн бэлиэтиир Айсен Сергеевич.
Аграфена КУЗЬМИНА, “Саха сирэ” хаһыат.