Бэҕэһээ, ахсынньы 22 күнүгэр, Опера уонна балет тыйаатырыгар Саха сирин кырасаабыссатын талар Мисс РС(Я) куонкурус буолла. Төрдүс төгүлүн ыытыллыбыт күөн күрэскэ сүүрбэ кыыс кыттыбытыттан, кыайыылааҕынан Влада Потапова таҕыста.
Быйылгы күрэс кыайыылааҕар коронаны Мисс РС(Я)-2017, Россияҕа 2-с вице-мисс аатын ылбыт Наталья Строева кэтэттэ. Манна даҕатан эттэххэ, сыл ахсын ыытыллар куонкуруска кыайыылааҕынан тахсыбыт кыыска салгыы бэриллэн иһэр үрүҥ көмүс корона аметистаах, топазтаах уонна бриллианнардаах. Маны сэргэ, кыайыылаах Россияҕа ыытыллар куонкуруска кыттар бырааптанар. Өссө быйылгы күөн күрэскэ историяҕа аан бастакытын мисс аатын ылбыт кыыска «Hyundai Solaris» массыына туттарыллынна.
Влада Потапова Дьокуускайга кыргыттары, далбар хотуттары кэрэ оҥорор салоҥҥа үлэлиир.
Куонкурус түмүгүнэн 1 вице-мисс аатын Нам кыыһа, ХИФУ 1 кууруһун устудьуона Людмила Трифонова ылла. 2 вице-мисс үрдүк аатыгар Таатта кэрэ куота, ХИФУ медицинэҕэ институтун устудьуона Людмила Тарабукина тигистэ.
Хаартыскалар СИА ылылыннылар