Саха сирин кылаабынай санитарнай бырааһа Маргарита Игнатьева вакцинация туһунан быһаарда
Саха Өрөспүүбүлүкэтин кылаабынай санитарнай бырааһа Маргарита Игнатьева коронавирус дьаҥын утары вакцинацияны үлэҕэ тэрийии туһунан быһаарда:
– СӨ кылаабынай санитарнай бырааһын ыам ыйын 19 күнүнээҕи уурааҕар олоҕуран, үлэ биэрээччи үлэһиттэриттэн вакцина ылбытын туһунан туоһу сурук ирдиир бырааптаах, оттон үлэһит бирикээс ирдэбилинэн быһыы туруорар пууҥҥа тиийиэхтээх.
Быһыыны туруорар пууҥҥа кини вакцинаны ылыан, доруобуйатын көрдөрүүтүнэн эбэтэр баҕа санаатынан аккаастанарын туһунан биллэриэхтээх.
Үлэ биэрээччи вакцинацияны тэрийэр эбээһинэстээх: үлэһит ахсаанын испииһэктээн мэдиссиинэ тэрилтэтигэр ыытыахтаах, вакцинаны ылыыга сайаапка түһэриэхтээх, сөптөөх кэмҥэ сөп түбэһиннэрэн тэрилтэтин кытта кыраапык оҥорон болдьоһуохтаах, быһыы ылбытын туһунан биллэриини тэрийиэхтээх, кэлбэтэхтэр уонна аккаастаммыттар испииһэктэрин оҥоруохтаах, бирикээс таһааран быһыы бэриллэр күнүн, үлэһиттэр уочараттарын аныахтаах, үлэһиттэргэ быһыы ыытыллар күнүн илии баттатан биллэриэхтээх, мэдиссиинэ үлэһиттэригэр үлэлиир миэстэ булан биэриэхтээх.
Үлэһит быһыы пууҥҥа кэлиэхтээх, онно мэдиссиинэ үлэһитэ процедура иннинэ вакцина төһө суолталааҕын, туох өҥөлөөҕүн быһааран биэриэхтээх, ыйытык уонна көрүү көмөтүнэн мэдиссиинэ өттүттэн утары көрдөрүүлэр суохтарын бигэргэтиэхтээх, сөбүлэһэрин туһунан мэктиэни ылыахтаах. Үлэһит вакцинаттан аккаастанар түгэнигэр тоҕо аккаастанарын туһунан быһаарыы сурук суруйуохтаах.