СӨ Үлэҕэ уонна социальнай сайдыыга миниистирин солбуйааччы Елена Теплякова бэрэссэдээтэллээх биэдэмистибэлэр икки ардыларынааҕы хамыыһыйа «Саха сирин кыһыл көмүс дьиэ кэргэттэрэ» кинигэҕэ 2019 сылга кимнээҕи киллэрэр туһунан мунньахтаата. Бу туһунан биһиэхэ СӨ Үлэҕэ уонна социальнай сайдыыга министиэристибэтин пресс-сэкирэтээрэ, түмэр-ырытар отдел сүрүннүүр исписэлииһэ Никита Прокопьев иһитиннэрдэ.
СӨ бырабыыталыстыбатын иһинэн ЗАГС управлениетын салайааччытын бастакы солбуйааччы Туйаара Такасаева, СӨ Үөрэх уонна наука министиэристибэтин эбии үөрэхтээһиҥҥэ отделын салайар Ольга Яшина, СӨ ыччат дьыалаларыгар уонна социальнай коммуникацияҕа министиэристибэтин гражданскай уопсастыба институтун кытары хардарыта сибээскэ отделын салайар Ольга Петрова, СӨ Култуураҕа уонна духуобунай сайдыыга министиэристибэтин профессиональнай ускуустубаҕа уонна духуобунай сайдыыга отделын салайар Ньургуйаана Илларионова, «Арассыыйа ийэлэрэ» Бүтүн Арассыыйатааҕы уопсастыбаннай хамсааһын эрэгийиэннээҕи салаатын бэрэссэдээтэлэ Прасковья Борисова, «Арассыыйа дьиэ кэргэнэ» национальнай уопсастыбаннай кэмитиэт Саха сиринээҕи салаатын бэрэссэдээтэлэ Мария Прокопьева кытыннылар.
«Саха сирин кыһыл көмүс дьиэ кэргэттэрэ» кинигэҕэ киллэриллэргэ бииргэ өр олорбут дьиэ кэргэттэр испииһэктэрэ бигэргэтилиннэ. Кинигэҕэ улуустартан 101 ходатайство киллэриллибит.
«Саха сирин кыһыл көмүс дьиэ кэргэттэрэ» кинигэҕэ киирэргэ туох ирдэнэрэ:
50 сылтан үөһээ бииргэ олорбуттара;
элбэх оҕолоох ыал оҕолорун дьоһун дьон гына иитэн, үөрэтэн таһаарбыттара;
өрөспүүбүлүкэ социальнай-экэнэмиичэскэй сайдыытыгар кылааттара;
дьиэ кэргэн үтүөтүн, өҥөтүн уопсастыба билиниитэ;
дьиэ кэргэн уопсастыбаннай олоххо көхтөөх кыттыылара.
Киллэриллибит докумуоннары сиһилии, болҕойон, балаһыанньаҕа сөп түбэһэллэрин көрөн, санаалары истэн, үллэстэн баран, 2019 сылга кинигэҕэ киллэриллэр испииһэги хамыыһыйа бигэргэттэ.