Саха сирин колледжын устудьуоннара Крымҥа бастаатылар

Бөлөххө киир:

Бу күннэргэ Аграфена Макарова аатынан Култуура уонна искусство колледжын “Эйгэ” тыйаатыра Крым Өрөспүүбүлүкэтигэр ыытыллыбыт бүтүн Арассыыйатааҕы бэстибээлгэ кыттан, лауреат үрдүк аатын ылан кэллэ.

Балаҕан ыйын 8-12 күннэригэр Судак куоракка “Крым муостата” бүтүн Арассыыйатааҕы бэстибээл ыытылынна. Тэрээһиҥҥэ барыта 11 эрэгийиэнтэн 500-тэн тахса кыттааччы сырытта. Бэстибээл үс куоратынан ыытылынна. Ол курдук, тэрээһиннэр Коктебельга, Феодосияҕа уонна Судакка буолан аастылар. Судак куорат баһылыга Игорь Степиков: “Судак куорат күнүгэр бу маннык тэрээһин буолан ааспыта улахан оруоллаах. Быйыл биһиги куораппыт төрүттэммитэ 1809 сылын туолла. Судак урут да, билигин да култуура киинэ этэ. Онон билиҥҥи үйэҕэ саҥа саҕахтары арыйан эрэриттэн үөрэбин. Уонна Судакка бэстибээли ыытыы үтүө үгэскэ кубулуйуо диэн тус бэйэм эрэнэбин”, – диэн бэлиэтээн этэр.

Саха сириттэн бэстибээлгэ Култуура колледжын “Эйгэ” устудьуоннар тыйаатырдара кыттыыны ылла. Колледж дириэктэрэ Захар Никитин иһитиннэрбитинэн, бу кинилэр иккис кыттааһыннара.

– Бэстибээл үрдүк таһымҥа барбытын бэлиэтээн этиэм этэ. Тэрээһин да, бырагыраама да өттүнэн барытынан. Биһиги колледжпыт бу дьаһалга иккис төгүлүн кыттар. Бэстибээли түмүктүүр улахан кэнсиэргэ тыйаатыр “Олоҥхо сирин тыына” диэн хомуһунан уус-уран дьүһүйүү туруорбута, – диэн бэлиэтиир Захар Никитин.

Бэстибээл кэмигэр биэс күн устата үс куоратынан, Судакка, Коктебельга уонна Феодосияҕа, араас тэрээһин ыытылынна. Кыттааччылар уус-уран көрдөрүүлэрин таһынан култуураҕа сыһыаннаах “төгүрүк остуоллар”, кэпсэтиилэр, аахсыйалар, быыстапкалар буолан аастылар. “Крым муостата – норуоттар доҕордоһуулара” диэн “төгүрүк остуолга” колледж дириэктэрэ Захар Никитин национальнай култуура, үөрэхтээһин туһунан дакылаат аахта.

“Эйгэ” тыйаатыр салгыы Алтай Өрөспүүбүлүкэтигэр “Өбүгэлэрбит нэһилиэстибэлэринэн” диэн эрэгийиэннэр икки ардыларынааҕы бэстибээлгэ кыттыаҕа.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0