Успуорт

Саха сирин кикбоксердарын туһунан кинигэ сүрэхтэннэ



Кикбоксиҥҥа Арассыыйа чөмпүйэнээтин чэрчитинэн Дьокуускайга ХИФУ «Точка кипения» кэллэктиибинэй үлэ киинигэр кикбоксинг тула «төгүрүк остуол» ыытылынна.

edersaas.ru

Мунньах иннинэ «Кикбоксинг Якутии. Хранители духа и традиций» диэн чөмпүйэнээт чэрчитинэн тахсыбыт кинигэ сүрэхтэниитэ буолла. Кинигэҕэ урукку сыллар уонна билиҥҥи кэм бастыҥ спортсменнарын туһунан иһитиннэриилэр, хаартыскалар, оннооҕор видеолар киирдилэр. Ааптардар энциклопедия быһыытынан Саха сирин, Арассыыйа уонна аан дойду кикбокседарын ааттарын киинигэҕэ ыйдылар.

Көрсүһүү иккис чааһыгар кикбоксинг сайдыытын, саха төрүт көрүҥнэрин тула «төгүрүк остуолга» кэпсэттилэр. «Төгүрүк остуол» кыттыылаахтарын ХИФУ ректора Анатолий Николаев эҕэрдэлээтэ. Мунньахха Ил Түмэн судаарыстыбаннай мунньаҕын бастайааннай кэмитиэтин бэрэссэдээтэлэ Михаил Гуляев, ХИФУ физическай култуура уонна успуорт институтун «Успуорт уонна айар индустрия» бырайыагын салайааччыта, Арассыыйа норуоттарын Ассамблеятын култуураҕа кэмитиэтин бэрэссэдээтэлин солбуйааччы Владимир Иванов, Инновация, цифровой сайдыы уонна инфокоммуникационнай технология миниистирэ Анатолий Семенов, Ыччат миниистирэ Степан Саргыдаев о.д.а. кыттыыны ыллылар.

«Сахаада-спорт» успуорт национальнай көрүҥнэрин ассоциациятын президенэ Александр Ким-Кимэн Саха сирин аан дойдуга таһаарарга саха төрүт көрүҥнэрэ улахан оруоллааҕын туһунан кэпсээтэ.

 

Михаил Гуляев «Боотур» тустуу киинин арыйыы туһунан кэпсэтиини ыытта. «Төгүрүк остуол» түмүгүнэн көрүллүбүт кыһалҕалар тула резолюция ылыныллыаҕа.

Виктория Бястинова, edersaas.ru, «Саха сирэ» хаһыат.

Ааптар хаартыскаҕа түһэриилэрэ.

2
0